“Манчестер Сити” трансфер рекордини ўрнатди

Англиянинг “Манчестер Сити” клуби бир трансфер ойнаси давомида футболчилар харидига сарфланган маблағ бўйича рекорд ўрнатди. Бу ҳақда “Transfermarkt” портали хабар берди.

Клуб 2026 йилги ёзги трансфер ойнасида янги футболчилар харид қилиш учун 526,2 миллион евро сарфлади ва “Ливерпуль”нинг 2025 йилда ўрнатган 483 миллион евролик рекордини янгилади.

“Манчестер Сити” ёзги трансфер ойнаси давомида икки марта ўзининг трансфер рекордини ҳам янгилади. Аргентиналик ярим ҳимоячи Энцо Фернандеснинг 145 миллион еврога трансфери клуб тарихидаги энг қиммат харид бўлди. У шу ёзда жамоага қўшилган Эллиот Андерсоннинг 135 миллион евролик трансферидан ўтиб кетди.

“Манчестер Сити” шунингдек, ёзги трансферлар ойнасида Аюб Бухадди, Илимaн Ндиайе, Аллан, Матис Дэтурбе, Жереми Монга, Жеронимо Рульи ва Пирс Чарльзни ўз сафига қўшиб олди.

Шу билан бирга, “Манчестер Сити” ёзда жами 337,2 миллион евро миқдорида футболчиларини сотди ва трансфер ойнасини 189,18 миллион евролик манфий баланс билан якунлади.

Бу кўрсаткич бошқа топ-клубларникидан анча паст. Масалан, “Тоттенхэм”нинг трансфер баланси минус 202,1 миллион евро, “Ливерпуль”ники эса минус 233,43 миллион еврони ташкил қилди.

Англия Премьер-лигасининг янги мавсумида икки туридан сўнг “Манчестер Сити” 6 очко билан турнир жадвалида пешқадамлик қилмоқда. Манчестерликларнинг навбатдаги учрашуви жорий йилнинг 5 сентябрь куни “Ковентри Сити”га қарши бўлиб ўтади.