Малика Диананинг укаси қирол Чарльз ҳақида кескин даъволарни илгари сурди

Буюк Британиянинг марҳум маликаси Диана Спенсернинг укаси Чарльз Спенсер янги китобида қирол Чарльзнинг Диана вафотидан кейинги хатти-ҳаракатлари ҳақида бир қатор даъволарни илгари сурди. Букингем саройи эса унинг баёнотларига ноодатий даражада кескин жавоб қайтарди. Бу ҳақда “Reuters” хабар берди.

Қайд этилишича, “Swan Song: Diana, My Sister” номли китоб бугун, 22 сентябрь куни сотувга чиқарилган. Унда Спенсер опаси Диананинг ҳаёти, қирол Чарльз билан никоҳи ва 1997 йилдаги вафоти ҳақида ўз хотираларини баён қилган.

Китобдан олдиндан эълон қилинган парчада Спенсер Диана вафотидан кейин ўша пайтдаги шаҳзода Чарльзнинг кайфияти ҳақида кескин фикр билдирган. Унинг ёзишича, Чарльз Диананинг ўлимидан сўнг ниҳоятда хурсанд бўлган.

Шунингдек, Спенсер Диана дафн маросимида унинг ўғиллари Уильям ва Гаррининг тобут ортидан юриши масаласида Чарльз билан тортишув бўлганини ёзган. Унга кўра, ўша пайтда 15 ёшли Уильям ва 12 ёшли Гарри бундай вазифани бажаришга мажбур қилинмаслиги кераклигини айтганида, Чарльз унга бақирган.

Спенсер китобни тарихнинг гувоҳи сифатидаги бурчи деб ҳисоблагани учун ёзганини билдирган. Бироқ Букингем саройи унинг хотираларини шубҳа остига олган. Сарой баёнотида ака-уканинг қайғуси ақлни хиралаштириши, қарорларга таъсир қилиши ва хотираларни ўзгартириши мумкинлиги таъкидланган.

Спенсер эса саройнинг бу муносабатини кескин танқид қилган. Унинг айтишича, бундай баёнот гўёки у ёлғон гапирганини англатади, бироқ қирол Чарльзнинг ўзи унинг айтганларини рад эта олмайди.

Диана ва қирол Чарльзнинг никоҳи

Чарльз Спенсер 17 ёшида, 1981 йилда 20 ёшли опаси Диананинг ўша пайтдаги шаҳзода Чарльзга турмушга чиқишига гувоҳ бўлган. Уларнинг никоҳи бутун дунёда катта қизиқиш уйғотган.

Диана ва Чарльзнинг Уильям ҳамда Гарри исмли икки ўғли бўлса-да, 1990-йилларга келиб, уларнинг оилавий муносабатлари ёмонлашгани ва бу ҳолат оммавий ахборот воситаларида кенг ёритилгани маълум.

Жуфтлик 1996 йилда расман ажрашган. Орадан бир йил ўтиб, Диана Парижда автомобиль ҳалокатида 36 ёшида вафот этган.

Диананинг дафн маросимида Спенсер нутқ сўзлаб, унинг ҳаёти ва шахсиятига юқори баҳо берган. Маросимни дунё бўйлаб миллиардлаб одамлар кузатган.

Чарльз Спенсер 1964 йилда туғилган ва Британия қироллик оиласи билан яқин алоқага эга аристократик оилада улғайган. Марҳум қиролича Елизавета II унинг чўқинтирган онаси бўлган.

У Оксфорд университетида тарих бўйича таҳсил олган, кейинчалик NBC News телеканалида ишлаган. 1992 йилда отаси вафот этгач, Англия марказидаги оилавий Алторп мулкини мерос қилиб олган.

Спенсер тарихий мавзудаги бир қатор китоблар ёзган. 2024 йилда эса мактаб-интернатда болалик даврида бошдан кечирган зўравонлик, эътиборсизлик ва ёлғизлик ҳақида “A Very Private School” номли мемуарини чоп этган.

Эслатиб ўтамиз, аввалроқ Чарльз Спенсернинг опаси – Малика Диана ҳақида ёзган, ҳали нашр этилмаган китобининг нидерланд тилидаги 4 та нусхаси Нидерландияда босмахонадан омборга олиб кетилаётган юк машинасидан ўғирлаб кетилгани ҳақида хабар берилган эди.