Мальдини Италия футбол федерациясидаги лавозимидан истеъфога чиқди

Афсонавий италиялик ҳимоячи Паоло Мальдини Италия футбол федерацияси (FIGC) техник директори лавозимидан истеъфога чиқди. Бу ҳақда журналист Фабрицио Романо ижтимоий тармоқда маълум қилди.

Шунингдек, Леонардо ҳам FIGC техник директори маслаҳатчиси лавозимини тарк этди.
Маълумотларга кўра, Мальдини ва Леонардо 2006 йилги жаҳон чемпиони Андреа Пирлони Италия миллий терма жамоасига бош мураббий этиб тайинлаш ғоясини қўллаб-қувватлаган.

Аввалроқ, Пирлонинг эҳтимолий тайинланиши унинг Россия букмекерлик компанияси билан тузган шартномаси туфайли сиёсий баҳсларга сабаб бўлгани хабар қилинган эди. Бир қатор италиялик депутатлар унинг айнан шу компания билан ҳамкорлиги туфайли номзодига қарши чиққан. Кейинчалик Пирло Италия терма жамоаси бош мураббийлигига номзод эмаслигини маълум қилди.

58 ёшли Паоло Мальдини футболчилик фаолияти давомида фақат “Милан” сафида тўп сурган. У клуб билан етти марта Италия чемпионлиги, беш марта Европа Чемпионлар лигаси, беш марта UEFA Суперкубоги, беш марта Италия Суперкубоги ва бир марта Италия кубогини қўлга киритган.

Италия миллий терма жамоаси сафида Мальдини 1994 йилги жаҳон чемпионатида кумуш, 1990 йилги мусобақада эса бронза медали соҳибига айланган. Шунингдек, у Европа чемпионатининг 2000 йилги баҳсида кумуш, 1988 йилги мусобақасида эса бронза медалини қўлга киритган.