Макрон Россияни кескин огоҳлантирди

Франция Президенти Эммануэль Макрон Россиянинг Европа ва Францияга қарши гибрид ҳужумлар кампаниясини кучайтираётганини айтиб, бунга жавоб қайтарилишини ваъда қилди. Бу ҳақда у кеча, 18 сентябрь куни Парижда халқаро вазият ва унинг оқибатларига бағишланган учрашувдан сўнг ўтказилган матбуот анжуманида сўз очди.

“Сўнгги ҳафталарда европаликлар ва Францияга, айниқса Россия томонидан юзага келаётган гибрид таҳдид кучайди”, деган Макрон.

Унинг айтишича, Москва Европани қўрқитиш ва қитъанинг Россия билан урушда Украинани қўллаб-қувватлаш борасидаги қатъиятини сусайтиришга уринмоқда.

“Бунинг натижаси аксинча бўлади. Биз қўрқмаймиз, чунки бугун ҳам, эртага ҳам хавфсизлигимиз Украинада ҳал қилинаётганини биламиз”, деган Франция Президенти.

Шунингдек, Макрон Россиянинг тажовузкор ҳаракатлари ўзгариб бораётганига мисол сифатида август ойида Лейпциг аэропортида содир бўлган дрон ҳужумига уринишни келтирган. Германия ҳукумати мазкур ҳодиса ортида Москва турганини билдирган.

Россия эса Европа давлатларининг гибрид ҳужумлар ҳақидаги айбловларини асоссиз деб ҳисоблайди. Москва бундай баёнотларни Россияга қарши кайфиятнинг кучайиши билан изоҳламоқда.

Макрон матбуот анжуманида Франциядаги юқори ёнилғи нархлари масаласига ҳам тўхталган. Ёнилғи нархларининг ошиши ҳукуматга қўшимча босим ўтказмоқда. Ҳукумат келаси йил учун бюджет тақчиллигини камайтиришга қаратилган режани якунлашга уринаётган бир пайтда мамлакат аҳолиси турмуш харажатлари ошишидан норозилик билдирмоқда.

Франциянинг юқори бюджет тақчиллиги ҳукуматнинг ёнилғи харажатларини қоплашга ёрдам бериш имкониятларини ҳам чекламоқда. Макрон ёнилғи нархларининг ошишига Франция танламаган ва унда иштирок этмаётган Яқин Шарқдаги уруш сабаб бўлаётганини айтган.

Макроннинг маълум қилишича, яқин ҳафталарда “Катта еттилик” (G7) давлатлари йиғилиши ўтказилади. Унда аъзо давлатлар ўртасидаги ҳамкорликни кучайтириш ҳамда давом этаётган энергетика инқирози шароитида таъминотни барқарорлаштириш масалалари муҳокама қилинади.

Эслатиб ўтамиз, аввалроқ Россия Президенти Владимир Путин Европа қўшинларининг Украинага киритилиши Россия билан урушга олиб келишини айтиб, Европа давлатларини кескин огоҳлантирганди.