Мадуро Америка қамоқхонасида Қуръон ва Инжил ўқияпти – ОАВ

Бруклин федерал тергов ҳибсхонасида сақланаётган Венесуэланинг ўғирланган президенти Николас Мадуро бўш вақтининг катта қисмини Инжил, Қуръон ва фалсафий адабиётларни ўқиш билан ўтказмоқда. Бу ҳақда унинг сақланиш шароити билан таниш олти нафар манбага таяниб, “The New York Times” хабар берди.

Газета маълумотларига кўра, 63 ёшли Мадуро дин вакиллари, жумладан, католик руҳонийси ва раввин билан мунтазам мулоқот қилиб туради.

Аввалроқ, сиёсатчи унинг аждодлари орасида Нидерландия Антиль оролларидан Венесуэлага кўчиб келган сефард яҳудийлари бўлганини айтган. Президентлик даврида Мадуро ўзини католик сифатида кўрсатган, евангелист (насронийликнинг протестантлик йўналишига мансуб диний оқим аъзолари) жамоалар билан алоқаларни қўллаб-қувватлаган ва ҳиндистонлик Сатья Саи Баба таълимотига қизиққан.

Ҳибсдаги вақти давомида собиқ президент сезиларли даражада озган. NYT манбалари вазн йўқотишни, жумладан, у бир неча бор шикоят қилган қамоқхона овқатларининг сифати билан боғламоқда. Ҳибсга олингунга қадар Мадуро палеодиетага амал қилган.

Нашр маълумотларига кўра, унинг рафиқаси Силия Флоресда соғлиқ билан боғлиқ янада жиддий муаммолар юзага келган.

Суд ҳужжатларига мувофиқ, 70 ёшли Флорес 11 килограммдан ортиқ вазн ва иккита тишини йўқотган. Унга кўкрак қафасидаги оғриқларга қарши дори-дармонлар тайинланган, адвокатлар эса июль ойида у енгил юрак хуружини бошдан кечирган бўлиши мумкинлигини тахмин қилмоқда. Ушбу тахминнинг тиббий тасдиғи мавжуд эмас.

Ҳимоя томонининг сўзларига кўра, Флорес қарийб уч ойни бир кишилик камерада ўтказган, суткасига уч-тўрт соат ухлайди ҳамда маҳбуслар муштлашувини тўхтатиш вақтида қўриқчилар қўллаган қалампирли аэрозоль таъсирига тушиб қолган.

Эслатиб ўтамиз, Мадуро ва унинг рафиқаси жорий йил 3 январь куни Америка ҳарбийларининг Каракасдаги операциясидан сўнг ҳибсда сақланмоқда. Улар АҚШда қўйилган айбловларни, жумладан, наркотрафик билан боғлиқ айбловларни рад этмоқда.

Суд муҳокамаси 2027 йил июнь ойига белгиланган.