Мьянма қирғоқларида 2 қайиқ чўкиб кетди. Қурбонлар 500 дан ортиқ бўлиши мумкин

Мьянма қирғоқлари яқинида қочқинларни олиб кетаётган икки қайиқнинг чўкиб кетиши оқибатида 500 дан ортиқ одам ҳалок бўлган бўлиши мумкин. Бу ҳақда “Reuters” хабар берди.

Маълумотларга кўра, икки қайиқ жорий йилнинг июнь ойи охирида Мьянманинг Ракхайн штатидаги ҳудуддан йўлга чиққан. Қайиқларда асосан рохинжа мусулмонлари бўлган. Уларнинг айримлари Бангладешдаги қочқинлар лагерларидан чиқиб, Малайзия, Индонезия ёки Таиландга етиб олишга ҳаракат қилган.

БМТ маълумотларига кўра, ҳодисалар ҳали расман тасдиқланмаган бўлса-да, қурбонлар сони 500 нафардан кўп бўлиши мумкин.

Қайд этилишича, бортида тахминан 250 киши бўлган биринчи қайиқ йўлга чиққанидан кўп ўтмай алоқани узган. Яна бир қайиқ эса қарийб 280 нафар йўловчи билан 8 июль куни Мьянманинг Ирравади қирғоқлари яқинида чўкиб кетган бўлиши мумкин.

Мутахассислар бундай денгиз йўллари ўта хавфли эканини таъкидламоқда. Андаман денгизи ва Бенгал қўлтиғи қочқинлар ҳамда мигрантлар учун дунёдаги энг хавфли йўналишлардан бири ҳисобланади. Ўтган йили ушбу ҳудудларда қарийб 900 нафар рохинжа қочқини ҳалок бўлган ёки бедарак йўқолган.

Маълумот учун, рохинжалар Мьянмада узоқ йиллардан бери таъқиб ва зўравонликларга дуч келиб келмоқда. 2017 йилда Мьянма ҳарбийлари Ракхайн штатида операция бошлаганидан сўнг 730 мингдан ортиқ рохинжа қўшни Бангладеш ҳудудига қочишга мажбур бўлган. Мьянма ҳукумати эса рохинжаларга қарши зўравонлик айбловларини рад этиб, уларни мамлакат фуқароси сифатида тан олишдан бош тортиб келади.

2021 йилда Мьянмада юз берган ҳарбий тўнтаришдан кейин вазият янада мураккаблашган. Мамлакатда давом этаётган қуролли тўқнашувлар Ракхайн штатига ҳам тарқалиб, рохинжа аҳолиси ҳукумат кучлари ва исёнчилар ўртасидаги жанглар орасида қолган. Жорий йилда ҳам Андаман денгизи ва Бенгал қўлтиғида қарийб 300 киши ҳалок бўлган ёки бедарак йўқолган.

Эслатиб ўтамиз, аввалроқ АҚШнинг Калифорния штатидаги Сан-Франциско кўрфазида, Алкатраз ороли яқинида 19 кишини олиб кетаётган понтон қайиғи чўкиб кетиши оқибатида бир киши ҳалок бўлган, яна икки киши бедарак йўқолган эди.