Лихтенштейн князлиги тахт ворислиги қоидаларини ўзгартирди

Лихтенштейн князлик хонадони тахтни фақат эркаклар томонидан мерос қилиб олиш қоидаларини бекор қилди. Маълум бўлишича, князликда эркаклар примогенитурасидан (тахтни отадан тўнғич ўғилга ўтиш принципи) абсолют примогенитура фойдасига воз кечилмоқда. Эндиликда жинсидан қатъи назар, энг тўнғич фарзанд тахт вориси бўлиши мумкин. Бу ҳақда кеча, 15 август куни эълон қилинган пресс-релизда сўз боради.

Ўзгаришлар хонадоннинг барча аъзоларининг учдан икки қисми кўпчилик овози билан қабул қилинган. Улар фақат тахт вориси шаҳзода Алоис ва унинг рафиқаси Софиянинг фарзандларидан келажакдаги авлодларга дахлдор бўлади. Уларнинг тўрт нафар фарзанди бор.

Алоис 20 йилдан ортиқ вақтдан бери давлат раҳбари вазифасини бажариб келмоқда, гарчи расман унинг отаси — шаҳзода Ҳанс-Адам II етакчи ҳисобланса-да. У 2004 йилда ваколатларининг катта қисмини тўнғич ўғлига топширган.

Энди тахтни мерос қилиб олиш гендер мансублигига эмас, балки фақат туғилиш тартибига асосланади. Жинси ўғил ёки қиз эканидан қатъи назар, тўнғич фарзанд тахтни мерос қилиб олади. Аёллар, шунингдек, Князлик хонадони ичида қарорлар қабул қилишда иштирок этиш бўйича тенг ҳуқуқларга эга бўлади.

“Қонунга киритилган ушбу ўзгариш билан биз Лихтенштейн князлигини ҳам, князлик хонадонини ҳам ушбу вазифага энг яхши тайёрланган инсон бошқаришини таъминламоқчимиз”, деб тушунтирди тахт вориси шаҳзода Алоиснинг ўзи.

Маҳаллий “Lie24” нашрининг қайд этишича, ушбу ислоҳот князлик оиласи ичидаги узоқ давом этган муҳокамалар натижаси бўлган.

Маълумот учун, аҳолиси 40 мингга яқин бўлган ушбу князлик бошқа Европа мамлакатлари фонида анча консерватив ҳисобланади. Масалан, мамлакатда аёллар овоз бериш ҳуқуқини яқинда — 1984 йилдагина қўлга киритган. Ўтган йили ҳукумат раҳбари лавозимига илк бор аёл киши сайланган: у ҳуқуқшунос Бриггита Хаас бўлган.