Кремлёв кичик Трампнинг тўйи харажатларини “кўтаргани” маълум бўлди

Кремлга яқин бўлган тадбиркор, Халқаро бокс ассоциацияси (IBA) раҳбари Умар Кремлёв АҚШ Президентининг ўғли кичик Дональд Трампнинг тўйини молиялаштиргани маълум бўлди. Бироқ кичик Трамп Кремлёв тўйга сарфлаган пулларни унга қайтарган. Бу ҳақда Америка етакчиси журналистларга маълум қилди.

Трампнинг фикрича, дўсти учун зиёфат ҳақини тўлаш фактида ҳеч қандай ноқонуний нарса бўлмаган ва ўзи ҳам кўп марта шундай қилган. Шунга қарамай, Президентнинг айтишича, у ушбу воқеадан хабар топгач, ўғлидан бу ҳақда сўраган ва у: “Мен унга пулларни қайтаряпман, дада”, деб жавоб берган.

“У бундай бўлишини хоҳламаган эди, шунинг учун, эшитишимча, ҳаммасини қоплаб берган”, дея қўшимча қилган Трамп. 

Оқ уй раҳбари, шунингдек, ўғли Кремлёвнинг Россия раҳбарияти билан алоқалари ҳақида билмаган бўлиши мумкинлигини, чунки “унинг таржимаи ҳолини текшириб ўтирмаганини” тахмин қилган. Кичик Трампга яқин манба “The Washington Post” нашрига маблағлар қайтарилгани фактини тасдиқлаган.

Бундан олдинроқ кичик Трампнинг рафиқаси Беттина Андерсон “қадрдон дўсти Умар” тўйнинг ўзидан сўнг иккита “ҳайратланарли байрам кечаси”ни ташкиллаштириб, янги оила қурганларга “фавқулодда саховатли тўй совғаси” қилганини айтган. 

“ProPublica” нашри Кремлёв Багама оролларидаги хусусий орол ижарасини, мушакбозликни ва юз минглаб долларлик йирик харажатларни тўлаганини, унинг жамоаси эса тантана тайёргарлигида иштирок этганини аниқлаган.

Суриштирув эълон қилингач, АҚШ Вакиллар палатасида кичик Трампнинг махфий маълумотларга кириш ҳуқуқи бор-йўқлиги, Оқ уйга Кремлёв билан алоқаларини очиқлаган-очиқламагани ва бу ерда хориждан аралашув йўқлигини аниқлашга киришган.

“Проект” маълумотларига кўра, Кремлёв Россия Президенти Владимир Путиннинг Хавфсизлик хизматини бошқарадиган Алексей Рубежний билан дўст. Товламачилик ва калтаклаш учун судланган тадбиркорнинг қўлида миллийлаштирилган “Рольф” автодилери ва бошқа активлар тўпланган. Шунингдек, у Россиянинг сиртдан букмекерлик тизимини назорат қилади, жумладан, бир нечта шундай компанияларнинг бенефициари ҳисобланади. Жорий йилнинг апрель ойида Путин Кремлёвни “Дўстлик” ордени билан мукофотлаган.

Кичик Трампнинг вакили Кремлёвни унинг дўсти деб атаган ва улар боксга ҳамда ҳордиқ чиқаришга бўлган умумий қизиқиш туфайли яқинлашганини айтган. Россиялик тадбиркорнинг матбуот хизмати ушбу маълумотни тасдиқлаб, улар бир неча йил олдин танишганини маълум қилган.

Маълумот учун, кичик Дональд Трамп ва унинг рафиқаси Беттина Андерсоннинг никоҳ тўйи жорий йилнинг май ойида бўлиб ўтган. 21-22 май кунлари Флорида штатининг Вест-Палм-Бич шаҳрида оила аъзолари иштирокида расмий никоҳ маросими ўтказилгач, 22-24 май кунлари Багама оролларидаги хусусий оролда дўстлар ва меҳмонлар учун уч кунлик дабдабали тўй байрами ва зиёфатлари ташкил этилган.