Кореяда 16 йил олдин умрбод қамалган ўзбекистонлик озод қилинди

Жанубий Кореяда босқинчилик ва қотиллик ҳамда бошқа айбловлар билан умрбод қамоқ жазосига ҳукм қилинган ўзбекистонлик 37 ёшли эркак Акмал Бозоров кеча, 16 октябрь куни озодликка чиқарилди. Бу ҳақда “The Korea Times” хабар берди. 

Қайд этилишича, Акмал Бозоров 16 йилдан ортиқ вақтини панжара ортида ўтказган. Унинг айбдор деб топилишига олиб келган полиция суриштирувида жиддий камчиликлар аниқланган ва шу сабабли суд қайта ўтказилгач, озодликка чиқарилган. У кеча, 16 октябрь куни кечқурун Чангвон қамоқхонасидан чиққан ва ташқарида кутиб турган отаси билан кўзда ёш билан кўришган.

“Ноҳақ қамалганимни ҳис қилиб, жуда кўп азоб чекдим. Аммо шу билан бирга, ушбу вазият жабрланувчининг оиласига етказиши мумкин бўлган катта қайғу ва оғриқ учун чин дилдан афсусдаман. Қолган суд жараёнларида ҳам фақат ҳақиқатни гапираман”, дейди Акмал Бозоров. 

Иш тафсилотлари 2009 йил 24 мартга бориб тақалади: Жанубий Кёнсан провинциясининг Чангвон шаҳри, Мёнсодон мавзесидаги тор кўчада тўхтаган такси ичида 50 ёшлардаги такси ҳайдовчиси ўлдириб кетилган ҳолда топилган. Ўша йилнинг 6 июль куни полиция бошқа бир такси босқинчилигига алоқадорликда гумонлаб уч кишини, жумладан, ўшанда 19 ёшда бўлган Акмални ҳибсга олган. Кейинчалик полиция уни март ойидаги қотиллик бўйича асосий гумондор сифатида аниқлаган.

Бозоров дастлаб полиция сўроқларида айбини тан олган, аммо кейинроқ ушбу тан олиш кўрсатмаси полициянинг шафқатсизлиги ва ноқонуний тергов ҳаракатлари орқали мажбуран олинганини таъкидлаган. У 2009 йил июль ойидаги такси босқинчилигида иштирок этганини тан олган, аммо март ойида содир бўлган такси ҳайдовчисининг ўлдирилишига ҳеч қандай алоқаси йўқлигини билдирган. Шунга қарамай, унга нисбатан қотиллик иши бўйича айблов эълон қилинган ва Олий суд 2010 йил апрель ойида унга берилган умрбод қамоқ жазосини ўз кучида қолдирган. 

У илк бор 2015 йилнинг июль ойида ишни қайта кўриб чиқиш ҳақида ариза берган, аммо у рад этилган. 2025 йил 2 январда у қайта кўриб чиқиш ишларига ихтисослашган адвокат Пак Чун Ён орқали Чангвон судига янги ариза топширган.

Суд ушбу ишни олиб борган Чангвон Чунбу полиция участкаси ходимлари ўз ваколатларини суиистеъмол қилганликлари ва Акмалнинг ҳуқуқларини бузганликлари ҳақида қарор чиқарган. Суд қарорига кўра, терговчилар айбни тан олиш кўрсатмасини олиш учун Акмалга унинг ДНКси воқеа жойидан топилгани ҳақида ёлғон гапирган ва аллақачон вафот этган жабрланувчини ҳали ҳам тирик деб даъво қилиб, уни чалғитган. Суд, шунингдек, Акмалнинг корейс тилини етарлича билмаслигига қарамай, полициянинг қасддан таржимон ажратмаганини ҳам танқид қилган.

Акмалнинг адвокати Пак янги далилларни, жумладан, жиноят қуроли деб тахмин қилинган буюм сотилган дўкон бўйича полиция томонидан сохталаштирилган ҳисоботни тақдим этган. Пак, шунингдек, такси метрида қайд этилган масофа ва полиция томонидан аниқланган йўналиш ўртасидаги 6 километрлик тафовутга эътибор қаратган.

Суд ноқонуний тергов ишни қайта очиш учун етарли асос бўлганини билдириб, янги далиллар қайта суд мажлисини ўтказаётган суд томонидан баҳоланиши кераклигини қўшимча қилган.

“Сохта тан олиш кўрсатмаси ва холис, илмий далиллар ўртасида жуда кўп қарама-қаршиликлар мавжуд эди. Қайта суд жараёнида биз терговдаги муаммоларни атрофлича ва чуқур ўрганиб чиқамиз”, дейди Пак. 

Эслатиб ўтамиз, аввалроқ Малайзияга саёҳатга борган 3 нафар ўзбекистонлик ўлим жазосига ҳукм қилингани ҳақида хабар берилган эди. Кейинроқ, уларнинг тирик экани ва жазо муддатини ўтаётгани маълум бўлди.