Киевга берилган зарба оқибатида ҳалок бўлганлар сони 37 нафарга етди

Россия дронлари Киев вилоятидаги ўқ-дори омборига зарба бериши ортидан кучли портлаш юз бериб, камида 37 киши ҳалок бўлди. Бу ҳақда Украина Президенти Владимир Зеленский маълум қилди.

Зеленскийнинг айтишича, Россиянинг дрон ҳужуми кеча, 29 август куни кечқурун Киев вилоятидаги Мила қишлоғи яқинида жойлашган ҳарбий объектда кучли портлашга сабаб бўлган. Ҳодиса оқибатида ўнлаб киши жароҳатланган, юзлаб аҳоли эвакуация қилинган.

Портлашдан сўнг ҳудудда кенг кўламли ёнғинлар юзага келган. Ҳалок бўлганлар орасида портлашдан кейин одамларга ёрдам беришга шошилган қўшни қишлоқ раҳбари ҳам бор.

“Одамлар ёнида портловчи моддаларни сақлаганларнинг даҳшатли бепарволиги”, деган Зеленский.

Унинг сўзларига кўра, зарба берилган объектда артиллерия снарядлари, миналар, дронлар ва бошқа ўқ-дорилар сақланган.

Бу Киев вилоятида сўнгги икки ой ичида Россия зарбалари ортидан юз берган иккинчи йирик портлаш бўлди. Июль ойида Вишнёво шаҳридаги шунга ўхшаш ҳодисада 10 киши ҳалок бўлган, юзлаб уйлар зарарланган эди.

“Вишнёводаги воқеадан кейин яна шундай жиноят содир бўлиши мутлақо қабул қилиб бўлмайди. Тафсилотлар жамоатчиликка зудлик билан тақдим этилишини кутяпман”, деган Зеленский.

Украина Президенти ҳарбий объектдаги эҳтимолий бепарволик бўйича жиноий ишлар очилганини маълум қилган. Украина Мудофаа вазирлиги эса ўқ-дориларни сақлаш учун масъул барча шахслар объектларни тўлиқ текширувдан ўтказиши кераклигини билдирган.

Зеленскийнинг таъкидлашича, Россия бир кечанинг ўзида Украинанинг яна 9 та вилоятига зарба берган. Киев эса реактив дронлар иштирокида деярли узлуксиз ҳужумлар остида қолган.

Киев вилояти губернатори Тимур Ткаченконинг маълум қилишича, эрталаб Борисполь туманига қилинган дрон ҳужумида 14 ёшли қиз ҳалок бўлган. Киев мэри Виталий Кличко эса шаҳарда уриб туширилган дрон оқибатида 2 ёшли қиз вафот этганини айтган.

Эслатиб ўтамиз, аввалроқ  Россия Украинанинг Киев вилояти Буча туманига ҳужум уюштириши оқибатида 27 киши ҳалок бўлиб, 42 киши жароҳатлангани хабар қилинганди.