Хоманаий Эронни дунёнинг “тўртинчи суперкучи” деб эълон қилди

Эрон олий раҳбари Мужтабо Хоманаий АҚШ ва Исроилнинг тажовузи мамлакатни янада кучайтирганини айтди. Унинг билдиришича, Эрон бугун айримлар томонидан дунёнинг тўртинчи суперкучи сифатида кўрилмоқда. Бу ҳақда Хоманаий 1980–1988 йиллардаги Эрон – Ироқ уруши бошланганини хотирлаш учун ўтказиладиган “Муқаддас мудофаа ҳафталиги” муносабати билан халқига йўллаган мурожаатида сўз очди.

“Бугун айримлар бизни дунёнинг тўртинчи суперкучи деб билади. Аммо пок авлодга содиқлик ва ҳақиқатни ҳимоя қилишдан қўрқмайдиган мамлакат илоҳий ҳисоб-китобларга кўра, дунёнинг энг қудратли давлатидир”, деган у.

Қайд этилишича, 1979 йилдаги инқилобдан сўнг Эрон ривожланишнинг янги босқичига қадам қўйган. Хоманаийнинг сўзларига кўра, инқилоб мамлакатни “мустамлакачилик” ва ташқи кучларнинг ҳукмронлигидан узоқлаштириб, тараққиёт, қадр-қиммат, мустақиллик ва Ислом оламида, шунингдек, бутун дунёда юксак обрў-эътибор сари олиб борган.

У АҚШнинг Ҳормуз бўғозида Эрон портларига нисбатан ўрнатган блокадасига ҳам тўхталган.

“Ўша кунларда Эрон жанубидаги икки денгиз душман кучлари бемалол ҳаракат қиладиган жой эди. Аммо бугун жасур жангчилар ва Ҳормуз бўғози қўриқчилари томонидан берилган оғир зарбалар сабабли улар Уммон денгизидан нарига ўта олмаяпти. Ҳар сафар бундай хавфни ўз зиммаларига олганларида, ўзларига зарар етказишди. Тез орада Уммон денгизи ҳам улардан тозаланади”, деган у.

Шунингдек, Хоманаий аввал душман Эроннинг ижтимоий таянчини доимий равишда заифлаштиришга ҳаракат қилганини айтган. Унинг айтишича, бугун эса жамиятнинг турли қатламлари ўрталаридаги фарқларга қарамай, қонуний ҳудудларини, жумладан, Ҳормуз бўғозини ҳимоя қилиш учун ҳаракат қилмоқда.

“Душманимиз қайтаришни истаётган ўша кунлар ўтмишда қолди ва бошқа ҳеч қачон такрорланмайди”, деган Эрон олий раҳбари.

Бундан ташқари, Хоманаий Эрон бундан буён бошқа давлатларнинг ҳукмронлигига ҳеч қачон йўл қўймаслигини таъкидлаган.

Эслатиб ўтамиз, аввалроқ Эронда мамлакат олий раҳбари Мужтабо Хоманаийнинг беш ой ичидаги илк видеоси эълон қилинган эди. Кейинроқ Эрон Президенти Масъуд Пезешкиён мамлакат Олий раҳбари Мужтабо Хоманаий билан учрашганини ва Хоманаий жисмонан бутунлай соғлом эканини маълум қилган.