Хоманаий АҚШдаги сайловлардан умид қилаётганларни огоҳлантирди

Эрон Олий раҳбари Мужтабо Хоманаий АҚШдаги оралиқ сайловлар натижалари Вашингтоннинг Теҳронга нисбатан сиёсатини ўзгартирмаслигини билдирди. У АҚШдаги сиёсий ўзгаришлардан умид қилаётганлар адашаётганини айтиб, Эронга қарши янги ҳужум содир этилса, анча кенг кўламли жавоб қайтарилиши ҳақида огоҳлантирди. Бу ҳақда “Reuters” хабар берди.

Қайд этилишича, Хоманаий жорий йилнинг 31 октябрь куни юқори мартабали ҳарбий қўмондонларга берган кўрсатмасида Эронга қарши янги ҳужум содир этилса, унга зудлик билан, самарали ва географик чекловларсиз жавоб қайтаришни буюрган. Шунингдек, Эроннинг нишонлар рўйхатини янгилашни топширган.

У эҳтимолий тўқнашувда ҳарбий ҳаракатлар қачон ва қандай шароитда якунланишини Эроннинг ўзи ҳал қилишини таъкидлаган.

Хоманаийнинг кеча, 4 ноябрь куни эълон қилинган ёзма баёнотида АҚШда ҳукмрон сиёсий кучларнинг ўзгариши Вашингтоннинг Эронга нисбатан муносабатини тубдан ўзгартирмаслиги айтилган. АҚШда партиялар алмашинуви мамлакатнинг Эронга нисбатан сиёсатини ўзгартиришига ёки муайян ён беришлар орқали Вашингтоннинг душманона муносабатини юмшатишга умид қилаётганлар янгишаётгани қайд этилган.

Шунингдек, Хоманаий Форс кўрфази ва Ҳормуз бўғозида юз берган воқеалар АҚШнинг енгилмаслиги ҳақидаги тасаввурни заифлаштирганини билдирган.

Бу баёнотлар АҚШда жорий йилнинг 3 ноябрь куни Конгрессга оралиқ сайловлар ўтказилганидан кейин янгради. Сайловларда республикачилар йўқотишларга учрагани Вашингтоннинг Яқин Шарқдаги ҳарбий ва дипломатик сиёсати ўзгариши мумкинлиги ҳақидаги муҳокамаларга сабаб бўлган.

Эслатиб ўтамиз, аввалроқ АҚШ Президенти Дональд Трамп ҳозирча Эронга янги ҳужум уюштириш бўйича шошилинч режаси йўқлигини, бироқ зарурат туғилса, ҳарбий ҳаракатларга тайёр эканини билдирганди.