Хитойда “Дельфин“ сабабли 1 миллион одам эвакуация қилинди

“Дельфин” тайфуни Хитойнинг шарқий қирғоғига етиб борди ҳамда мамлакатнинг бир қатор ҳудудларида кучли ёмғир, сув тошқини ва кўчки хавфи юзага келгани сабабли 1 миллиондан ортиқ аҳоли хавфсиз ҳудудларга эвакуация қилинди. Бу ҳақда “Reuters” хабар берди.

Қайд этилишича, “Дельфин” тайфуни бу йил Хитойга етиб келган энг кучли тропик циклон ҳисобланиб, кеча, 9 август куни соат 17:30 атрофида шарқий Чжэцзян провинциясининг Юйхуан шаҳри яқинидан қуруқликка чиққан.

Тайфун қирғоққа етиб келган вақтда унинг марказига яқин ҳудудда шамол тезлиги секундига 42 метрни, яъни соатига 151 километрни ташкил этган. Бу Саффир-Симпсон шкаласи бўйича 1-тоифадаги довулга тенг.

Синоптиклар 10 августгача Чжэцзян, Шанхай, Фуцзянь шимоли, Цзянси шимоли-шарқи, Аньхой маркази ва жануби ҳамда Цзянсу провинциясининг катта қисмида кучли ёмғир ёғишини прогноз қилган.

Чжэцзяннинг марказий ва шарқий ҳудудларида 250–500 миллиметргача ёғингарчилик кузатилиши мумкин. Кучли ёмғир айниқса тоғли ҳудудлар ва кичик дарёлар бўйларида сув тошқини ҳамда кўчки хавфини ошириши кутилмоқда.

Расмийлар денгиздаги ишчиларни хавфсиз жойларга олиб чиққан, кемаларга эса портларга қайтиш буюрилган. Шунингдек, сув омборлари, тоғ оқимлари, кўчки хавфи юқори ҳудудлар, қурилиш майдонлари ва сайёҳлик масканларида назорат кучайтирилган.

Тайфун сабаб Хитой шарқида транспорт қатновлари ҳам жиддий чекланган.

Шанхайда камида 30 минг 300 киши эвакуация қилинган, қарийб 1500 та авиақатнов бекор қилинган. Шаҳарнинг Яншань портида эса 500 дан ортиқ кичик ва ўрта ҳажмдаги кемалар хавфсиз жойларга кўчирилган.

Қўшни Чжэцзян провинциясидаги Вэнчжоу шаҳрида эса 900 мингдан ортиқ аҳоли бошқа жойга эвакуация қилинган ва 1000 дан зиёд фавқулодда бошпана очилган.

Фуцзянь провинциясида ҳам юқори хавфли ҳудудлардан 98 минг 900 киши эвакуация қилинган. Ҳудудда 55 та қирғоқбўйи йўловчи пароми қатнови тўхтатилган, 115 та денгиз қурилиш лойиҳаси вақтинча бекор қилинган ва 290 та қурилиш кемаси хавфсиз сувларга олиб чиқилган.

Хитой метеорология идораларининг маълумотларига кўра, тайфун қуруқликка киргач, марказий ва жануби-ғарбий Хитой томон ҳаракатланиб, аста-секин кучсизланиши кутилмоқда. Бироқ унинг таъсири кучли ёғингарчиликни узайтириши ва сув тошқини ҳамда кўчки хавфини ошириши мумкин.

Эслатиб ўтамиз, аввалроқ Япониянинг жанубий Окинава префектурасига “Дельфин” тайфуни етиб келиши оқибатида 6 киши жароҳатланганди, 50 мингдан ортиқ хонадон ва бино электр таъминотидан узилгани ҳақида хабар берилган эди.