Кескин қадам: Зеленский Россияга кунига 1000 та дрон учиришни буюрди

Украина Президенти Владимир Зеленский мамлакат мудофаа-саноат мажмуаси олдига узоқ масофага урувчи дронлар ишлаб чиқаришни кўпайтириш вазифасини қўйди, токи Украина Қуролли кучлари кун давомида Россия ҳудуди бўйлаб мингтагача дрон учириш имконига эга бўлсин. Бу ҳақда давлат раҳбари Ставка йиғилиши якунлари бўйича ўзининг Telegram-каналида маълум қилди. 

Зеленскийнинг сўзларига кўра, ҳозирда Украина Россияга кунига ўртача 300 та дрон билан ҳужум қилмоқда ва бу етарли эмас. 

“Вазифа: Россияга қарши узоқ масофали жанглар учун кунига мингта дрон. Жуда аниқ мақсад бор ва бу вазифани бажарамиз”, дейди у.

Ишлаб чиқаришни бир неча баравар ошириш заруратини Зеленский Россиянинг фуқаролик объектларига зарбалари кучайгани билан изоҳлаган – Москва ҳар куни Киев, Харьков, Запорожье, шунингдек, Суми, Чернигов, Днепропетровск, Херсон ва Киев вилоятларига ҳужум қилаётган “Шаҳед” реактив дронларини оммавий равишда қўлламоқда. Бир вақтнинг ўзида Президент бундай нишонларга қарши самарали кураша оладиган тутувчи дронлар ишлаб чиқаришни тезлаштиришни талаб қилган.

Зеленскийнинг айтишича, Украина Мудофаа кучларининг Россия ҳудудидаги объектларга тизимли зарбалари аллақачон сезиларли иқтисодий ва логистик натижаларни бермоқда. Россия Федерациясида бензин захиралари камайди, логистика билан боғлиқ жиддий муаммолар юзага келди. Бундан ташқари, Россия ўз тарихида биринчи марта бензин импорт қилишни ва ўз нефть компанияларини қўллаб-қувватлаш учун бюджет маблағларини сарфлашни бошлади. Президент агар Москва урушни тугатиш бўйича нормал музокаралардан қочишда давом этса, Кремль учун йўқотишлар фақат ортиб боришидан огоҳлантирган.

Эслатиб ўтамиз, аввалроқ Россиянинг Оренбург ва Уфа шаҳарларидаги Ozon компаниясининг логистика объектлари Украина дронлари ҳужумига учрагани ҳақида хабар берилган эди.