Кенияда юзлаб болаларни очликдан ўлдирган эркак 200 йилга қамалди

Кенияда 191 кишининг, жумладан, 190 нафар боланинг очликдан ўлимига сабаб бўлган диний секта раҳбари Пол Маккензи 200 йилга озодликдан маҳрум этилди. Бу ҳақда BBC хабар берди.

Маълум қилинишича, суд Маккензини қотилликда айбдор деб топиб, ушбу жиноят учун 100 йил, одамларни очликдан ўлимга олиб келган жиноятлари учун яна 100 йил қамоқ жазоси тайинлаган.

Тергов маълумотларига кўра, Маккензи ва унинг 28 нафар шериги секта аъзоларига фарзандларини очликдан ўлдиришни буюрган. Улар болалар шу йўл билан Исо Масиҳ билан учрашишига ишонтирилган. Мазкур воқеа дунёдаги энг кўп қурбонларга сабаб бўлган диний оқимлар билан боғлиқ фожиалардан бири сифатида қайд этилган.

Судья Диана Мочаче Маккензи жиноятларда асосий жиноий жавобгарликни ўз зиммасига олишини таъкидлаган. Унинг сўзларига кўра, тайинланган жазо бундай ваҳший жиноятлар қонун доирасида энг қатъий чоралар билан жазоланишини кўрсатувчи аниқ сигнал.

Ўзини пастор деб атаган Маккензи 2023 йилда Кения соҳиллари яқинидаги Шакахола ўрмонидан 400 дан ортиқ жасад топилганидан сўнг ҳибсга олинган. Суд-тиббий экспертизаси натижаларига кўра, қурбонларнинг аксарияти очлик ва ҳолдан тойиш оқибатида вафот этган. Айримлар эса бўғилиш, бўйин сиқилиши ёки бошидан олган жароҳатлари сабаб ҳалок бўлган.

Айрим жасадларнинг чириб кетгани сабабли ўлим сабабини аниқлаш имкони бўлмаган. Қутқарилган айрим жабрланувчилар эса оғир ҳолдан тойиш оқибатида кўп ўтмай вафот этган.

Қайд этилишича, Маккензига нисбатан эҳтиётсизлик оқибатида одам ўлимига сабаб бўлиш ва терроризм билан боғлиқ алоҳида айбловлар ҳам қўйилган. У ўзига нисбатан билдирилган айбловларни тан олмаяпти.