Каримов ўзбекларни дунёдан узиб қўйди, унга ҳайкал қўйиш керак – Акаев (видео)

Қирғизистоннинг биринчи президенти Асқар Акаев Ўзбекистоннинг Биринчи Президенти Ислом Каримовнинг сиёсати ҳақида гапириб, “унга Қирғизистонда ҳайкал қўйган бўлар эдим”, дея фикр билдирди. Бу ҳақда у “Exclusive.kg” подкастида сўз очди.

Акаевнинг сўзларига кўра, Ўзбекистоннинг Каримов давридаги ёпиқ сиёсати ўз вақтида қўшни давлатлар, жумладан, Қирғизистон ва Қозоғистон тадбиркорлари учун қўшимча имкониятлар яратган.

Унинг қайд этишича, 1990-йилларда у қирғизистонлик тадбиркорлар бозор механизмларини ўзлаштира олиши ва ўзбек бизнеси билан рақобатлаша олишига шубҳа қилган. Агар ўша пайтда Ўзбекистон худди ҳозирги Президент Шавкат Мирзиёев давридагидек очиқроқ сиёсат олиб борганида, қирғиз бизнесменлари учун рақобатга бардош бериш анча қийин бўлар эди.

“Ҳаммамиз Ислом Каримовдан миннатдор бўлишимиз керак. У Ўзбекистондаги ўзбекларни дунёдан узиб қўйди. Шу орқали у қирғизлар ва қозоқлар учун имкониятлар яратди. Бунинг учун мен Ислом Каримовга Қирғизистонда ҳайкал қўйган бўлардим”, дейди Акаев.

Унинг қўшимча қилишича, айнан шу туфайли қирғизистонлик тадбиркорлар бозор механизмларини ўзлаштиришга муваффaқ бўлган.

Маълумот учун, Асқар Акаев 2005 йил 24 март воқеаларидан кейин Қирғизистонни тарк этган ва ўша йилнинг 3 апрелида расман истеъфога чиққан. 2021 йилда у “Қумтор” олтин кони бўйича жиноят иши доирасида кўрсатма бериш учун Қирғизистонга келган ва ўшанда лойиҳани амалга оширишда йўл қўйилган хатолар учун халқдан ошкора узр сўраган.

Эслатиб ўтамиз, 2026 йилнинг июнь ойида Акаев Иссиқкўл халқаро форумида ҳам иштирок этиб, унда Қирғизистоннинг амалдаги Президенти Садир Жапаровга яна бир президентлик муддатини беришни таклиф қилганди. У буни иқтисодий ислоҳотларни давом эттириш зарурлиги билан изоҳлаб, “иқтисодий мўъжиза” режасини амалга ошириш учун камида 8-10 йил талаб этилишини айтиб ўтган.