Қарийб 10 млн евролик ўғирланган асарлар топилди

Италия полицияси мамлакат шимолидаги музейдан ўғирланган француз рассомлари Пьер Огюст Ренуар, Поль Сезанн ва Анри Матисснинг учта асарини топди. Бу ҳақда DW хабар берди.

Маълум қилинишича, асарлар жорий йилнинг март ойида Парма шаҳри яқинидаги хусусий музейдан ўғирланган. Улар полиция томонидан гумонланувчилардан бирининг уйидан топилган.

Парма полицияси бошлиғи Андреа Пальяронинг билдиришича, жиноят иши бўйича Молдовадан бўлган тўққиз киши гумонланувчи сифатида қаралмоқда. Уларнинг беш нафари ўғирликда бевосита иштирок этган бўлиши мумкин.

Ўғирланган асарлар орасида Ренуарнинг “Балиқлар” номли асари, Сезанннинг қалам ва акварельда чизилган “Олча билан натюрморт” картинаси ҳамда Матисснинг “Террасадаги одалиска” акварели бор. Уларнинг тахминий бозор қиймати мос равишда 3 миллион, 6 миллион ва 20 минг евро деб баҳоланган.

Асарлар Парма яқинидаги санъатшунос ва коллекционер Луиджи Маньяни номи билан аталувчи хусусий коллекциядан ўғирланган. Унда Тициан, Альбрехт Дюрер, Питер Пауль Рубенс ва Франсиско Гойя каби машҳур рассомларнинг асарлари ҳам сақланади.

Музей маълумотларига кўра, ўғрилар юзларини беркитган ҳолда бинога кириш эшигини бузиб очган ва уч дақиқа ичида картиналар билан бирга ҳодиса жойидан қочиб кетган. Музей маъмурияти жиноят олдиндан режалаштирилганини билдирган.

Эслатиб ўтамиз, аввалроқ Франциянинг шимоли-шарқидаги Lalique музейида йирик ўғирлик содир этилгани ҳақида хабар берилган эди.