Илҳом Алиев Дональд Трамп билан телефон орқали мулоқот қилди

Кеча, 8 август куни Озарбайжон Президенти Илҳом Алиев ва АҚШ Президенти Дональд Трамп ўртасида телефон орқали мулоқот бўлиб ўтди.

Суҳбатда Вашингтон саммитига бир йил тўлгани муносабати билан Озарбайжон ва Арманистон ўртасидаги тинчлик жараёни муҳокама қилинган. Томонлар узоқ йиллик можарога барҳам берилганини ва минтақада тинчлик ўрнатилганини таъкидлаган.

Шунингдек, икки давлат ўртасидаги иқтисодий алоқалар, TRIPP транспорт лойиҳаси ва минтақада транспорт боғлиқлигини кучайтириш масалалари муҳокама қилинган.

Шунингдек, Алиев Трампга Вашингтон тинчлик саммитига мезбонлик қилгани ва тинчлик кун тартибига қўшган ҳиссаси учун миннатдорлик билдирган. Трамп эса Илҳом Алиевнинг тинчлик жараёнидаги ролини юқори баҳолаган.

Суҳбат давомида Озарбайжон нефть маҳсулотларининг Арманистонга экспорти, транзит юкларни Озарбайжон ҳудуди орқали Арманистонга ташиш ва икки давлат ўртасида савдо алоқаларининг бошлангани минтақадаги ижобий ўзгаришлар сифатида қайд этилган.

Томонлар Озарбайжон–АҚШ стратегик шериклигига оид ҳужжат имзоланганини тарихий воқеа сифатида баҳолаб, икки давлат муносабатлари сифат жиҳатидан янги, юқори босқичга кўтарилганини таъкидлаган.

Алиев Трампга Озарбайжоннинг G20 саммитига таклиф қилингани учун ҳам миннатдорлик билдирган.

Томонлар Озарбайжон–АҚШ стратегик шериклигини янги босқичга олиб чиқишга келишиб олган.

Эслатиб ўтамиз, жорий йилнинг 7 август куни Президент Шавкат Мирзиёев ҳам Дональд Трамп билан телефон орқали мулоқот қилган эди.