Футболда электрон карточкалар синовдан ўтказилди

Уругвайда футбол ҳакамлари учун мўлжалланган электрон карточкалар илк бор “Насьонал” ва “Рентистас” жамоалари ўртасидаги Кубок учрашувида синовдан ўтказилди. Бу ҳақда “Reuters” нашри хабар берди.

Тажриба Уругвай Кубогининг “Насьонал” ва “Рентистас” жамоалари ўртасидаги 1/8 финал учрашувида қўлланилди. Мезбонлар 3:0 ҳисобида ғалаба қозонган баҳсда ҳакам Эдуардо Варела анъанавий карточкалар ўрнига смартфонга ўхшаш электрон қурилмадан фойдаланди. 

Қурилмадаги биринчи электрон карточка 12-дақиқада кўрсатилди. Ўшанда “Рентистас” ярим ҳимоячиси Хуан Пабло Плада огоҳлантирилди.

Учрашув давомида бошқа огоҳлантиришлар ҳам қайд этилди. Кейинчалик “Насьонал” футболчиси Науэл Ҳелос майдондан четлатилди. Ҳакам қурилма экранида қизил чироқни ёқиш орқали қизил карточкани намойиш қилди.

Уругвай футбол ассоциацияси маҳаллий компания билан ҳамкорликда “виртуал карточкалар” деб номланган қурилмаларни илк бор катта футболга олиб кирди. Гаджет электрон блокнот вазифасини бажаради. У орқали ҳакамлар огоҳлантиришлар, четлатишлар, алмаштиришлар, пенальтилар ва учрашувдаги бошқа воқеаларни қайд этишлари мумкин. Қурилмага киритилган маълумотлар реал вақт режимида ассоциациянинг электрон тизимига узатилади.