Франческо Тотти футболни баскетболга алмаштирди

2006 йилги жаҳон чемпиони, Италия терма жамоасининг собиқ футболчиси Франческо Тотти “Максима Рома” баскетбол клубига маслаҳатчи этиб тайинланди. Бу ҳақда Тотти ўзининг Instagram саҳифасида маълум қилди.

“Мен янги рағбатлар излаётган ва ўзимни янги синовларда синаб кўриш истагини ҳис қилаётган эдим. Менга таклиф қилинган вазифа ва энг муҳими, лойиҳа бошиданоқ ёқди. Биз Рим ва римликларга улар қўллаб-қувватлайдиган, фахрланадиган ва ўзларини тан оладиган баскетбол жамоасини тақдим этмоқчимиз”, деб ёзди Тотти.

49 ёшли собиқ футболчи клубнинг мухлислар билан алоқалари ҳамда ижтимоий лойиҳалари учун масъул бўлади.

Маълумот учун, Франческо Тотти футболчилик фаолияти давомида фақат “Рома” шарафини ҳимоя қилган ва узоқ йиллар жамоа сардори бўлган. У римликлар сафида 785 та учрашувда майдонга тушиб, 307 та гол урган ва 205 та голли узатмани амалга оширган.

Тотти “Рома” билан Италия чемпионлиги, икки марта Италия Кубоги ва икки марта Италия Суперкубогини қўлга киритган. У 2017-2019 йилларда клуб директори лавозимида ҳам фаолият юритган.

Собиқ ҳужумчи Италия терма жамоаси сафида 58 та ўйин ўтказиб, 9 та гол урган. У 2006 йилда Италия билан жаҳон чемпионига айланган.