Фаластинлик талабалар Колумбия университетини камситишда айблаб, судга берди

Фаластинлик талабалар ва ходимлардан иборат гуруҳ Колумбия университетини 2023 йил охиридан бери университетдаги фаластинликлар жамоасига нисбатан камситишга йўл қўйганликда айблаб, судга мурожаат қилди. Бу ҳақда Нью-Йоркдаги судга киритилган даъво аризасига таяниб, “Reuters” хабар берди.

Даъвода университет фаластинлик талабалар ва ходимларни таъқиблардан етарлича ҳимоя қилмагани ҳамда уларга нисбатан “адолатсиз ва бир томонлама интизомий муҳокамалар” орқали босим ўтказгани таъкидланган.

Қайд этилишича, Колумбия университети аввал ҳам камситишга йўл қўйгани ҳақидаги айбловларни рад этган ва ҳар қандай нафратни қоралаган. Маҳаллий ОАВ маълумотига кўра, университет суд жараёни давом этаётгани сабабли иш бўйича изоҳ беришдан бош тортган. “Reuters” сўровига ҳам университет жавоб бермаган.

Колумбия университети ва АҚШнинг бошқа олий таълим муассасаларида Фаластинни қўллаб-қувватловчи намойишлар Исроилнинг 2023 йил октябридаги ҲАМАС ҳужумидан кейин Ғазога қарши ҳарбий амалиётлари бошланганидан сўнг кенг тарқалган. Намойишчилар АҚШнинг Исроилга кўрсатаётган ёрдамини тўхтатишни ҳамда университетлар Исроилни қўллаб-қувватловчи компаниялардан маблағларини чиқаришини талаб қилган.

2025 йил май ойида Колумбия университети университетнинг асосий кутубхонаси фаолиятини фаластинликларни қўллаб-қувватловчи намойиш доирасида тўхтатган 65 нафардан ортиқ талабани ўқишдан вақтинча четлатган. Бу воқеа университет АҚШ Президенти Дональд Трамп маъмурияти билан музокара олиб бораётган пайтда содир бўлган.

Трамп маъмурияти ўша даврда Колумбия университетини фаластинликларни қўллаб-қувватловчи намойишлар вақтида антисемитизмга йўл қўйганликда айблаб, университетнинг федерал маблағларини қисқартирган эди.

Айни пайтда намойишчилар, жумладан айрим яҳудий ташкилотлари, Исроилнинг Ғазодаги амалиётлари ва Фаластин ҳудудларидаги оккупациясига қарши чиқишни антисемитизм билан тенглаштириш мумкин эмаслигини таъкидлаб келмоқда. Улар Фаластин ҳуқуқларини ҳимоя қилиш экстремизмни қўллаб-қувватлаш билан бир хил эмаслигини билдирган.

2025 йил июль ойида Колумбия университети федерал текширувларни якунлаш ва федерал молиялаштиришнинг асосий қисмини тиклаш эвазига АҚШ ҳукуматига 200 миллион доллардан ортиқ маблағ тўлашга келишган.

Шу билан бирга, сўз эркинлиги тарафдори бўлган ташкилотлар Колумбия университетининг намойишларга қарши чораларини танқид қилган. Уларнинг қайд этишича, намойишлар давомида талабалар ҳибсга олинган, ўқишдан четлатилган, университетдан ҳайдалган ва айрим ҳолатларда уларнинг дипломлари бекор қилинган.

Эслатиб ўтамиз, аввалроқ 2025 йилнинг октябрь ойида Ғазо сектори ва Иордан дарёсининг Ғарбий соҳилида ўт очиш тўхтатилганидан бери 1200 дан ортиқ фаластинлик Исроил кучлари томонидан ўлдирилгани ҳақида хабар қилинганди.