Эрон франциялик дипломатларга мамлакатга қайтишни тақиқлади

Жорий йилнинг 17 август куни Эрон Ташқи ишлар вазирлиги Франция элчихонасининг икки ходимининг мамлакатга қайтишига рухсат берилмаслигини маълум қилди. Бу ҳақда “Reuters” хабар берди.

Вазирлик вакили Исмоил Бағойининг сўзларига кўра, ушбу шахслар Эронда фуқаролик жамиятини қўллаб-қувватлаш билан боғлиқ фаолият билан шуғулланган. Эрон томони бундай фаолият дипломатик ваколатхоналар фаолиятини тартибга солувчи Вена конвенцияси қоидаларига зид эканини билдирган.

“Бу шахсларнинг фуқаролик жамиятини қўллаб-қувватлаш билан боғлиқ фаолият билан шуғуллангани Вена конвенцияси бузилганини тан олишнинг ўзидир”, дейди Бағойи ҳафталик матбуот анжуманида.

У бошқа тафсилотларни очиқламаган. Франция Ташқи ишлар вазири Жан-Ноел Барро эса ўтган ой “France Inter” нашрига берган интервьюсида элчихона ходимларининг вазифаси Эрон фуқаролик жамияти, талабалар ва санъаткорларни қўллаб-қувватлашга қаратилган дастурларни ишлаб чиқишдан иборат эканини айтган.

Мазкур дипломатик можаро июль ойида кучайган. 21 июль куни Франция Эрон хавфсизлик кучларини Теҳрондаги элчихона ходимларини ҳибсга олиш ва уларга нисбатан жисмоний босим ўтказишда айблаган. Теҳрон эса Ғарб давлатларининг Эрон ички ишларига аралашувига, айниқса АҚШ ва Исроил билан давом этаётган можаро фонида, кескин муносабат билдириб келмоқда. Оқибатда Франция элчихонасининг икки ходими Эронга қайтиш ҳуқуқидан маҳрум қилинган.

Эслатиб ўтамиз, аввалроқ Россия дронлари Руминия ҳаво ҳудудини бир неча бор бузгани ортидан мамлакат Россия элчихонасининг бир дипломатини чиқариб юборганди.