Эрон Ҳормуздан ўтувчи кемалардан бож олмоқчи

Эрон парламенти Миллий хавфсизлик ва ташқи сиёсат қўмитаси Ҳормуз бўғози орқали ўтувчи кемалардан бож ундиришни назарда тутувчи қонун лойиҳасининг тегишли моддасини маъқуллади. Бу ҳақда “Tasnim” хабар берди.

Маълум қилинишича, қўмита қонун лойиҳасининг 3-моддасига ўзгартиш киритишни маъқуллаган. Унга кўра, Ҳормуз бўғози орқали транзит қилишга рухсат берилган давлатларнинг кемалари Эрон томонидан кўрсатиладиган хизматлар учун бож тўлаши керак бўлади.

Таклиф этилаётган тўловлар экологик хизматлар, ёқилғи қуйиш, суғурта ва хавфсизликни таъминлаш хизматларини қамраб олади. Қонун лойиҳасида, шунингдек, бўғоз орқали ўтишга рухсат берилган кемалардан ушбу хизматлар учун тўлов ундирилиши белгиланган.

Бундан аввал Теҳрон Ҳормуз бўғозини очиш учун АҚШга 6 та шарт қўйган эди. Эрон Олий миллий хавфсизлик кенгаши котиби Муҳаммад Боқир Зулқадрнинг билдиришича, АҚШ ўз сиёсатини ўзгартирмагунича Ҳормуз бўғози очилмайди.

Эрон томони қўйган шартлар орасида АҚШнинг Эронга таҳдид ва ҳақоратларни тўхтатиши, Эрон ҳамда унинг Ливан, Фаластин, Яман ва Ироқдаги иттифоқчиларига қарши урушни бутунлай тугатиши бор. Шунингдек, Теҳрон денгиз блокадасини бекор қилиш ва АҚШнинг ҳарбий-денгиз ҳамда ҳарбий-ҳаво кучларини олиб чиқиш, Эронга етказилган зарарни тўлиқ қоплаш, санкцияларни бекор қилиш ҳамда музлатилган Эрон активларини очишни талаб қилган.

Эслатиб ўтамиз, аввалроқ АҚШ Президенти Дональд Трамп Ҳормуз бўғозини ҳозирда “Америка ҳудуди” деб ҳисоблашини айтганди. Бу иддао Трампдан учинчи бор янграши бўлган эди.