Эбола балоси: Вирус билан касалланганлар сони 4 000 дан ошди

Конго Демократик Республикасидаги Эбола вируси тарқалиши давом этаётган эпидемия даврида тасдиқланган касалланишлар сони илк бор 4 000 дан ошди. Бу ҳақда мамлакат ҳукумати маълумотларига таяниб, “Reuters” хабар берди.

Мамлакатдаги жамоат саломатлиги институтининг сўнгги ҳисоботига кўра, ҳозиргача 4 053 нафар кишида Эбола вируси тасдиқланган. Уларнинг 1 850 нафари вафот этган.

Мутахассислар инфекция расман 15 май куни эълон қилинганидан бир неча ой олдин ҳам тарқала бошлаган бўлиши мумкинлигини, шунинг учун ҳақиқий касалланганлар сони расмий кўрсаткичлардан анча юқори бўлиши эҳтимолини билдирмоқда. Касаллик мамлакатнинг Итури, Шимолий Киву, Жанубий Киву, О-Уэле ва Чопо вилоятларида қайд этилган.

“Science” журналида ўтган ой эълон қилинган тадқиқотда эпидемия жорий йилнинг январь ойида, эҳтимол ундан ҳам олдин Итури вилоятида бошлангани қайд этилган. Тадқиқотчилар январь ўрталаридан 15 майга қадар 500 дан ортиқ гумонли ҳолатни аниқлаган.

Мутахассасларнинг таъкидлашича, касалликнинг кеч аниқланиши, эпидемиологик назорат тизимининг ортиқча юклама остида қолиши, ҳарбий можаролар ҳамда мазкур вирус турига қарши вакцина ва даволаш воситаларининг етишмаслиги эпидемияни жиловлашни қийинлаштирган.

Маълумот учун, ҳозирги эпидемия дунёда қайд этилган иккинчи энг йирик Эбола тарқалиши ҳисобланади. Бундан каттароқ эпидемия 2014–2016 йилларда Ғарбий Африкада кузатилган бўлиб, Гвинея, Либерия ва Сьерра-Леонеда 28 мингдан ортиқ касалланиш ҳолати қайд этилган.