Эҳсонга йиғилган пулларни тотализаторга тикиб юборган йигит ушланди (видео)

Фарғона вилоятида 19 ёшли йигит фирибгарлик ва кибержиноятда гумонланиб ушланди. У 408 минг АҚШ доллар қийматдаги криптоактивларни ноқонуний айлантиргани, шунингдек, интернетда хайрия учун йиғилган пулларни ўзлаштириб, тотализаторга тикиб юборгани аниқланган. Бу ҳақда Кибержиноятларга қарши курашиш департаменти хабар берди.

Қайд этилишича, дастлаб йигит Ўзбекистонда криптоактивлар савдоси билан боғлиқ қонунчилик талабларини мунтазам равишда бузиб келгани аниқланган. У ноқонуний равишда айлантирган криптоактивларнинг умумий қиймати 408 минг АҚШ долларидан, миллий валютада эса 4 миллиард 894 миллион 152 минг сўмдан ортиқ бўлган.

Кейинги суриштирувларда 2007 йилда Тошкент шаҳрида туғилган йигит бошқа фуқароларни алдаб, уларнинг пулларини ўзлаштириш билан ҳам шуғуллангани аниқланган.

У ижтимоий тармоқларда саломатлигида жиддий муаммо бўлган беморлар учун ёрдам сўраб эълон қилинган видеоларни кузатган. Шундан сўнг Instagram’даги блогер номидан Telegram’да сохта аккаунт очиб, беморнинг яқинларига ёзган.

Гумонланувчи улардан картага қанча маблағ йиғилганини сўраб, пулларни вақтинча ўз картасига ўтказишни, кейинчалик нақд шаклда қайтариб беришни ваъда қилган. Шу йўл билан у жами 43 миллион сўмга яқин маблағни ўзлаштирган. Шунингдек, беморнинг таниши бўлган Paynet шохобчаси ходимидан ҳам 30 миллион сўмдан ортиқ пулни худди шу усулда ўз картасига ўтказдирган.

Гумонланувчининг айтишича, у ўзлаштирилган пулларни тўғридан-тўғри онлайн тотализатор ҳисоб рақамига киритган. У жами 76 миллион сўмни тикиб, ютқазганини билдирган.

“Қилган ишимдан афсусдаман. Бу ҳолат бошқа такрорланмаслигига, ўзимни тўғрилашга ваъда бераман”, дея баёнот берган у.

Билдирилишича, мазкур ҳолат юзасидан йигитга нисбатан Жиноят кодексининг 168-моддаси (Фирибгарлик) 3-қисми “б” ва “в” бандлари ҳамда 278-8-моддаси (Крипто-активлар айланмаси соҳасидаги қонунчиликни бузиш) 3-қисми “а” банди билан жиноят иши қўзғатилган.

Эслатиб ўтамиз, аввалроқ Бухоро вилоятида Telegram орқали фуқароларнинг телефонларига зарарли APK файллар юбориб, банк карталаридаги маблағларни ўғирлаган кибержиноят гуруҳи фош этилгани ҳақида хабар берилган эди.