Дунёнинг биринчи ракеткаси “US Open”ни ўтказиб юборади

Дунёнинг биринчи рақамли теннисчиси, италиялик Янник Синнер АҚШ очиқ чемпионати – “US Open-2026” мусобақасида иштирок этмайди. Бу ҳақда у ўзининг X ижтимоий тармоғидаги саҳифасида маълум қилди.

“Жамоам ва тиббий ходимлар билан астойдил ишлаганимизга қарамай, қийин қарор қабул қилишимизга тўғри келди: мен бу йилги “US Open” мусобақасида иштирок эта олмайман. Сўнгги бир неча кун ичида Монте-Карлода кортга қайтдик ва ўнг тиззамдаги муаммодан тикланиш учун ҳали кўпроқ вақт кераклигини англадик. Албатта, жуда хафаман ва кўнглим қолди, чунки Нью-Йорк қалбимда алоҳида ўрин тутади”,  деб ёзди Синнер.

Мусобақа арафасида италиялик теннисчи ўнг тиззасидаги жароҳат сабаб Монреаль ва Цинциннатида ўтказилган “Мастерс” турнирларида иштирок этишдан воз кечган эди.

Маълумот учун, 25 ёшли Синнер ҳозирда ATP рейтингида етакчилик қилмоқда. У фаолияти давомида ATP турнирларида яккалик баҳсларида 30 та чемпионликни қўлга киритган.

Италиялик теннисчи “Катта дубулға” турнирларида беш марта чемпион бўлган. У икки марта Австралия очиқ чемпионати (2024, 2025) ва Уимблдон (2025, 2026), шунингдек, “US Open” (2024) ғолибига айланган.

Синнер, шунингдек, икки карра ATP финали чемпиони (2024, 2025) ва Дэвис кубоги ғолиби (2023, 2024) ҳисобланади.

“US Open” мавсумнинг сўнгги “Катта дубулға” турнири бўлиб, жорий йилнинг 30 августдан 13 сентябрга қадар Нью-Йоркда ўтказилади. Мусобақа қаттиқ қопламали кортларда бўлиб ўтади. Ўтган мавсумда Синнер “US Open” финалида испаниялик Карлос Алькарасга мағлуб бўлган эди.