Дэвид Бекхэм “Нант” клубини сотиб олишга қизиқмоқда

“Манчестер Юнайтед”нинг собиқ футболчиси ва “Интер Майами” клубининг эгаси Дэвид Бекхэм кутилмаганда Франциянинг “Нант” клубини сотиб олиш бўйича келишувда потенциал иштирокчи сифатида пайдо бўлди. Бу ҳақда “Ouest-France” нашри хабар берди.

Манбага кўра, “Нант” эгалари Лига 2 га тушиб кетган клубни сотиш масаласини кўриб чиқмоқда. Ҳозирда жамоани сотиб олишга учта потенциал харидор қизиқиш билдирган. Улардан бирининг таклифи 100 миллион евро атрофида баҳоланмоқда.

Нашрнинг таъкидлашича, Бекхэмнинг номи ҳам “музокараларда яна пайдо бўлган”. Унинг вакили аввалроқ маҳаллий потенциал инвесторлар ташаббус гуруҳи вакиллари билан учрашиб, “Нант” билан боғлиқ эҳтимолий лойиҳа ҳақида маълумот сўраган.

Бекхэмнинг футбол клубларига сармоя киритиш бўйича муваффақиятли тажрибаси бор. У “Интер Майами” клубининг эгаларидан бири ҳисобланади. Американинг мазкур жамоаси сўнгги йилларда MLS’даги энг кўзга кўринган лойиҳалардан бирига айланди.

Маълумот учун, Бекхэмнинг бойлиги 1,36 миллиард евро атрофида баҳоланмоқда. Энди англиялик собиқ футболчи ўз футбол бизнесини Францияда ҳам кенгайтириш имкониятига эга бўлиши мумкин.