Бу ислоҳотларимизга берилган баҳо – Президент Россиядан қайтган аёл билан суҳбати ҳақида (видео)

Бугун, 24 сунтябрь куни Президент Шавкат Мирзиёев Андижондаги мулоқот чоғида кеча бир аёл билан бўлган суҳбатни эслади. Президентнинг айтишича, ҳозирда аёл юқори даромадли ишда ишлайди ва унинг бир фарзанди бу йил Андижон давлат тиббиёт институтига ўқишга кирган.

“Оддий бир аёл кўз ёши билан: “Жаноб Президент, Россияда ишлаб юрганман, неча йиллардан бери. Икки нафар фарзандим бор, она бўлиб ўзим тарбиялаяпман”, деди.

Унинг кўзида нур бор эди. Менга айтган биринчи гапи – “Бу ерда даромадим анча юқори”, дегани бўлди”, дейди давлат раҳбари.

Президентни яна бир жиҳат хурсанд қилганини айтиб, аёлнинг икки фарзандидан бири бу йил Андижон давлат тиббиёт институтига ўқишга кирганини таъкидлаган.

“Мен ундан: “Беш йил олдин фарзандингиз ўқишга киришига ишонармидингиз?” деб сўрадим. Бутун зал “Ҳеч қачон бундай бўлмаган”, деб жавоб берди.

Бу ислоҳотларимизга берилган халқнинг баҳоси эмасми?” дейди Шавкат Мирзиёев.