Британияда чақалоқ илк бор она қорнида операция қилинди

Буюк Британияда туғилиши кутилаётган чақалоқ ҳали онаси қорнидалигида ноёб жарроҳлик амалиётини бошдан кечирди. Шифокорлар дунёда илк бор гастрошизис деб аталувчи оғир туғма нуқсонни ҳомила бачадонда бўлган пайтда тузатишга муваффақ бўлди. Бу ҳақда BBC хабар берди.

Қайд этилишича, Лондонда яшовчи Мейзи Севаж ҳомиладорликнинг 26-ҳафтасида ўтказилган текширувда ҳомиласида гастрошизис аниқланган. Бу туғма нуқсонда киндик тўғри ривожланмайди ва чақалоқнинг ичаклари қорин бўшлиғидан ташқарида шаклланади.

Кейинги текширувларда ҳомиладаги нуқсон мураккаб экани маълум бўлгач, британиялик шифокорлар оилани АҚШнинг Хьюстон шаҳридаги Техас болалар шифохонасига юборган. Ҳомиладорликнинг 26-ҳафтасида шифокорлар Мейзи Севажнинг бачадонини қисман очиб, кичик инвазив жарроҳлик усули ёрдамида ҳомиланинг ичакларини аста-секин қорин бўшлиғига қайтарган. Шундан сўнг бачадон яна ёпилиб, ҳомиладорлик одатдаги тартибда давом эттирилган.

Мазкур амалиёт гастрошизисни туғилишдан олдин даволаш бўйича дунёдаги илк клиник синов доирасида амалга оширилган. Тео исмли чақалоқ ушбу усул қўлланган учинчи, Буюк Британиядан эса биринчи бемор бўлган.

Операциядан сўнг ҳомиладорлик тўлиқ муддатига етган ва Тео жорий йилнинг февраль ойида табиий йўл билан соғлом туғилган. Ҳозир у беш ойлик бўлиб, шифокорлар унинг ривожланиши меъёрида кечаётганини билдирган.

Мутахассисларнинг айтишича, гастрошизис ҳар 3 минг чақалоқдан бирида учрайди. Касалликнинг оғир шаклларида янги туғилган чақалоқ бир неча ой реанимацияда даволаниши, бир неча марта операция қилиниши, айрим ҳолларда эса ичак трансплантациясига муҳтож бўлиши мумкин. Ҳатто замонавий тиббий ёрдам кўрсатилган тақдирда ҳам бундай беморларнинг тахминан ҳар ўнинчисининг ҳаётини сақлаб қолишнинг имкони бўлмайди.

Операцияни бошқарган ҳомила жарроҳи Майкл Белфорт ушбу натижани “ажойиб муваффақият” деб баҳолаган. Унинг сўзларига кўра, бу усул келажакда бачадондайоқ бошқа туғма нуқсонлар, жумладан, айрим юрак ва ўпка касалликларини даволаш имконини ҳам яратиши мумкин.

Шифокорлар клиник синов муваффақиятли якунланса, ушбу амалиётни Буюк Британияда ҳам кенгроқ қўллашни режалаштирмоқда.

Буюк Британиялик аёл ривожланаётган ҳомиласидаги нуқсон туфайли боласини икки марта дунёга келтирганди.