Британия мусодара қилинган Россия нефтини сотиб, маблағни Украинага беришни режалаштирмоқда

Буюк Британия ҳукумати июнь ойида қўлга олинган ва Лондон Россиянинг “яширин нефть флоти” билан боғлаётган Smyrtos танкеридаги қарийб 100 минг тонна Россиянинг Urals маркидаги нефтини сотиш имкониятини кўриб чиқмоқда. Тушган маблағ эса Украинага ёрдам сифатида йўналтирилиши мумкин. Бу ҳақда “The Telegraph” нашри хабар берди.

Британия амалдорларининг фикрича, танкер бортидаги нефть эндиликда қонун бўйича Британия мулки ҳисобланади. Шу боис ҳукумат уни сотиш ёки бошқа мақсадларда ишлатиш ҳуқуқига эга.

Вазирлар нефтини аукцион орқали сотиш вариантини муҳокама қилмоқда. Унинг бозор қиймати тахминан 35 миллион фунт стерлингга баҳоланган. Олинган маблағни Украинанинг ҳарбий эҳтиёжларига йўналтириш режалаштирилмоқда.

Нашр маълумотига кўра, бу режа ҳозирча дастлабки босқичда турибди. Амалдорлар маблағни Киевга тўғридан-тўғри ўтказиш ёки Украина Қуролли кучлари учун ҳарбий техника сотиб олиш имкониятларини ўрганмоқда. Россия эса Украинага ҳар қандай ҳарбий ёрдам кўрсатилишига қарши чиқмоқда.

Нашрнинг ёзишича, Британия ҳукумати 14 июнь куни Ла-Манш бўғозида ушлаб қолинган танкердаги нефтини сотиш учун махсус аукцион ўтказиши мумкин. Манбаларнинг айтишича, Британия Миллий жиноятчиликка қарши агентлиги терговни якунлагандан кейин танкернинг ўзи Россияга қайтарилиши эҳтимолдан холи эмас.

Шу билан бирга, Британия ҳукумати нефтини мамлакат ичида қайта ишлаб, аҳолини энергия билан таъминлаш мақсадида фойдаланиш вариантини ҳам кўриб чиқмоқда. Бироқ бу нефтини давлат мулкидан энергетика компаниялари тасарруфига қандай ўтказиш масаласи ҳозирча ҳал қилинмаган.

Буюк Британия Бош вазири Кир Стармер 14 июнь куни унинг кўрсатмаси билан Британия ҳарбийлари илк бор Ла-Манш бўғозида Россия билан боғлиқ деб ҳисобланган Smyrtos нефть танкерини қўлга олганини маълум қилган эди.

Олти соат давом этган операцияда Қироллик денгиз пиёдалари, Chinook, Merlin Mk4 ва Wildcat вертолётлари, RAF P-8 патрул самолёти ҳамда HMS Sutherland ва HMS Ledbury кемалари иштирок этган. Қўлга олинганидан кейин танкер Англиянинг жанубий соҳиллари яқинида назорат остида лангар ташлаб турибди.

MarineTraffic маълумотларига кўра, Smyrtos Кaмерун байроғи остида сузган. Кема 5 июнь куни Россиянинг Усть-Луга портидан чиқиб кетган ва нашр маълумотига кўра, қиймати тахминан 40 миллион долларлик нефтини Ҳиндистонга олиб бораётган бўлган.

Москва танкернинг ушлаб қолинишини кескин танқид қилган. Россия Тўғридан-тўғри инвестициялар жамғармаси раҳбари ва Президентнинг инвестиция-иқтисодий ҳамкорлик бўйича махсус вакили Кирилл Дмитриев бу ҳаракат Британия жамоатчилиги эътиборини ички муаммолардан, айниқса миграция инқирозидан чалғитишга уриниш эканини айтган.

Россия Ташқи ишлар вазирлиги эса “яширин флот” атамаси Европа Иттифоқи давлатлари томонидан денгиз йўлларидаги ҳаракатларга қарши чораларни оқлаш учун ўйлаб топилганини таъкидлаган.