“Браво, афандим!” Эрдўған баскетбол ўйнади (видео)

Туркия Президенти Ражаб Тойиб Эрдўғаннинг баскетбол ўйнагани акс этган видеолавҳалар ижтимоий тармоқларда улашилди. Узоқ вақтдан бери сафдошларидан иборат жамоа билан баскетбол ўйинлари ўтказиб келаётган Эрдўған иштирок этган беллашувларда фахрий баскетболчилар ҳам куч синашмоқда. Бу ҳақда “Takvim” хабар берди.

Ижтимоий тармоқлардаги кадрларда Эрдўғаннинг ҳам тўплаган очколар, ҳам жамоадошларига берган кўрсатмалари эътиборни тортмоқда. Кескин ва шиддатли курашларга бой ўтган ўйинлардаги қизиқарли ва самимий мулоқотлар ҳам видеодан ўрин олган.

Ўйинларда Эрдўғандан ташқари Меҳнат ва ижтимоий ҳимоя вазири Ведат Ишиқхон, Миллий разведка ташкилоти (MİT) раҳбари Иброҳим Қалин, собиқ вазирлар Мевлют Чавушўғли ва Мустафо Варанк ҳамда Туркия Баскетбол федерацияси (TBF) Бош координатори ўринбосари Ўмер Онан иштирок этаётганини кўриш мумкин.

Видеода яшил жилетли жамоа сардори бўлган Эрдўғаннинг Туркия Баскетбол федерацияси Бош координатори ва собиқ миллий баскетболчи Ўмер Онанни руҳлантиргани ҳам жой олди. Эрдўған ўйин давомида Онанга: “Қани Ўмер, очкони қўлга кирит!” дея мурожаат қилган.

“TRT Haber” телеканали томонидан эълон қилинган видеода Туркия Президенти майдон бўйлаб фаол ҳаракат қилаётганини кўриш мумкин. Кадрларда Эрдўғаннинг тўпни саватга бир неча марта муваффақиятли ташлаганини кўриш мумкин.

“Браво, афандим!”, дейди унинг аниқ зарбаларидан сўнг ўйиндаги жамоадошдари.

Эслатиб ўтамиз, аввалроқ афсонавий собиқ NBA баскетболчиси, ҳозирда таниқли эксперт, таҳлилчи ва телебошловчи Шакил О’Нил Ражаб Тойиб Эрдўғанга жарима улоқтириш мусобақасида кутилмаганда мағлуб бўлганди.