Боснияда бортида 15 киши бўлган вертолёт қулади. Қурбонлар бор (видео)

Босния ва Герцеговинада Европа Иттифоқининг тинчликпарвар миссияси таркибида хизмат қилаётган Италия ҳарбий вертолёти ҳалокатга учради. Бу ҳақда “Reuters” хабар берди.

Маълум қилинишича, ҳодиса кеча, 29 октябрь куни Брчко округидаги Горице қишлоғи яқинида содир бўлган. Вертолёт бортида жами 15 киши бўлган.

Ҳалокат оқибатида 4 киши ҳалок бўлган, яна 11 нафари жароҳатланган. Қурбонларнинг икки нафари Италия армияси ҳарбий хизматчилари, қолган икки нафари эса Италия Қизил Хоч ташкилотининг кўнгилли ҳарбий корпуси аъзолари бўлган. Жароҳатланганларнинг барчаси шифохонага етказилган.

Маҳаллий ОАВ тарқатган тасвирларда ҳарбий транспорт вертолёти ерга ағдарилиб тушгани ва унинг қисмлари парчаланиб кетгани акс этган. Италия Мудофаа вазирлиги ҳалокат сабабларини аниқлаш бўйича тергов бошланганини маълум қилган.

Қайд этилишича, вертолёт Европа Иттифоқининг EUFOR Althea миссияси доирасида фаолият юритган. Мазкур миссия Босния ва Герцеговинада Дейтон тинчлик келишувининг бажарилишини назорат қилади.

Италия Мудофаа вазири Гвидо Крозетто ҳалок бўлганларнинг яқинларига ҳамдардлик билдирган. Бош вазир Жоржа Мелони ҳам қурбонларнинг оилалари ва миссия иштирокчиларига таъзия изҳор қилган.

Эслатиб ўтамиз, аввалроқ АҚШнинг Орегон штатида икки вертолёт ҳавода тўқнашиб кетиши оқибатида 3 киши ҳалок бўлгани ҳақида хабар берилган эди.