БМТ Бош котиби зудлик билан Украинада ўт очишни тўхтатишга чақирди

БМТ Бош котиби Антониу Гутерриш Украинада тўлиқ ва зудлик билан ўт очишни тўхтатишга чақирди. Бу ҳақда у бугун, 1 сентябрь куни “ШҲТ плюс” саммитида сўз очди.

Гутерришнинг сўзларига кўра, ўт очишни тўхтатиш тинчлик бўйича музокараларни бошлаш учун йўл очади.

“Орадан тўрт йилдан кўпроқ вақт ўтди. Энди Украинада тўлиқ ва зудлик билан ўт очишни тўхтатиш вақти келди. Бу халқаро ҳуқуқ, жумладан, БМТ Низоми ва тегишли резолюцияларга мувофиқ адолатли, мустаҳкам ва кенг қамровли тинчликка эришиш бўйича музокараларга йўл очади”, деган БМТ Бош котиби.

Қайд этилишича, Гутерриш аввал ҳам Украинада ўт очишни тўхтатиш бўйича гапирган. 2025 йил июлида у Украинага ракета ва дронлар ёрдамида уюштирилган йирик ҳужумларни қоралаб, тўлиқ, зудлик билан ва шартсиз ўт очишни тўхтатишга чақирган.

Россия Ташқи ишлар вазирлиги раҳбари Сергей Лавров эса Россия фронт чизиғи бўйлаб ўт очишни тўхтатишни тинчлик музокараларини бошлаш учун дастлабки шарт сифатида қабул қилмаслигини билдирган. Россия Президенти матбуот котиби Дмитрий Песков ҳам Украина можаросини “музлатиш” Москва учун мақбул эмаслигини таъкидлаган.

Эслатиб ўтамиз, аввалроқ Россия Президенти Владимир Путин Украинадаги урушни Донбасс устидан тўлиқ назорат ўрнатиш каби минимал мақсадга эришмасдан якунлаш ўз ҳаёти учун хавф туғдиришидан хавотир билдирган эди.