Бишкекдаги ШҲТ саммитида 28 та ҳужжат имзоланди

Бугун, 1 сентябрь куни Бишкекда бўлиб ўтган Шанхай ҳамкорлик ташкилоти Давлат раҳбарлари кенгаши йиғилиши якунида 28 та ҳужжат имзоланди ва тасдиқланди. Бу ҳақда ШҲТ саммити якунлари бўйича берилган маълумотда келтирилган.

Йиғилиш Қирғизистон Президенти Садир Жапаров раислигида ўтказилди. Саммитнинг асосий ҳужжати ШҲТ ташкил этилганининг 25 йиллиги муносабати билан қабул қилинган Бишкек декларацияси бўлган. Шунингдек, ташкилот Низомига ҳам ўзгартиришлар киритилган.

Қайд этилишича, ҳужжатларнинг бир қисми хавфсизлик масалаларига бағишланган. Хусусан, хавфсизликка таҳдид ва чақириқларга қарши курашиш бўйича Универсал марказ ҳамда ШҲТ Наркотикларга қарши маркази тўғрисидаги низомлар тасдиқланган.

Шунингдек, 2030 йилгача гиёҳвандликка қарамлик ва синтетик наркотикларнинг тарқалишига қарши курашиш дастурлари қабул қилинган.

ШҲТ давлатлари рақамли технологиялар, сунъий интеллект ва ахборот хавфсизлиги соҳаларида ҳамкорлик қилишга келишиб олган. 2026-2028 йилларга мўлжалланган халқаро ахборот хавфсизлиги бўйича ҳамкорлик режаси ҳамда минтақавий маълумотларни қайта ишлаш марказлари ва ҳисоблаш қувватларини яратиш концепцияси тасдиқланган.

Маълум қилинишича, ҳужжатларнинг алоҳида қисми экологик масалаларга қаратилган. ШҲТ доирасида биохилма-хилликни сақлаш ва “яшил технологик коридор”ни ривожлантириш режалари қабул қилинган.

Транспорт соҳасида эса 2026-2030 йилларга мўлжалланган ШҲТ давлатларининг портлари ва логистика марказларини ривожлантириш режаси тасдиқланган.

Бундан ташқари, иштирокчи давлатлар жиноятчиликка қарши курашиш, иқлим ўзгариши ва сунъий интеллектни ривожлантириш соҳаларида ҳамкорлик қилишга доир ҳужжатларни ҳам имзолаган.

Эслатиб ўтамиз, аввалроқ Қирғизистон Президенти Садир Жапаров Чуй вилоятидаги баландлиги 4050 метр бўлган номсиз тоғ чўққисига “Шанхай ҳамкорлик ташкилоти чўққиси” номини бериш тўғрисида фармон имзолаганди.