Билл Гейтс сунъий интеллект ва роботларга солиқ жорий этишни таклиф қилди

Microsoft асосчиси Билл Гейтс сунъий интеллект ва роботлар одамлар ўрнини эгаллаши ортидан ушбу технологияларга янги турдаги солиқ жорий этишни таклиф қилди. Бу ҳақда “Meduza” хабар берди. 

Гейтс ўз блоги­да эълон қилган мақолада иш берувчи ходим ёллаганида унинг даромадидан солиқ тўлашини, робот сотиб олинганда эса бундай харажатлар одатда ишлаб чиқариш харажати сифатида ҳисобдан чиқарилишини таъкидлади. Унинг фикрича, амалдаги солиқ тизими компанияларни одамлар ўрнига машиналардан фойдаланишга ундамоқда.

“Мен сунъий интеллектдан фойдаланиш ҳамда роботларга солиқ жорий этиш керак, деб ҳисоблайман”, деб ёзди Гейтс.

Миллиардернинг таъкидлашича, бундай солиқ сунъий интеллект сабабли инсон меҳнатидан воз кечиш жараёнини бироз секинлаштириши, шунингдек, тушган маблағларни ходимларни қайта тайёрлаш ва ижтимоий ҳимоя тизимини мустаҳкамлашга йўналтириш имконини бериши мумкин.

Бироқ Гейтс солиқни барча соҳаларга бирдек татбиқ этмаслик кераклигини таъкидлади. Унинг фикрича, у соғлиқни сақлаш ва таълимни арзонлаштириш каби жамият учун фойдали бўлган сунъий интеллект қўлланилишларини чекламаслиги лозим.

Сунъий интеллектнинг келажаги ва унинг жамиятга таъсири ҳақида бошқа йирик технологик компаниялар раҳбарлари ҳам фикр билдирмоқда.

Meta раҳбари Марк Цукерберг яқинда сунъий интеллект саноатининг келажагига бағишланган катта эссе эълон қилган. Илон Маск эса The Economist бош муҳаррири Занни Минтон Беддоусга берган интервьюсида сунъий интеллектнинг келажаги ҳақида гапирган.

Эслатиб ўтамиз, аввалроқ Ўзбекистонда корхоналарга СИ жорий қилиш харажатининг 50 фоизи компенсация қилиниши ҳақида хабар берилган эди.