Бернэмнинг илк хорижий ташрифи манзили маълум бўлди

Бугун, 24 август куни Буюк Британия Бош вазири Энди Бернэм лавозимига киришганидан кейинги илк хорижий ташрифи доирасида Украинага боради. Ташриф давомида у Киевнинг узоқ масофали ракеталар ишлаб чиқариш салоҳиятини оширишга ёрдам берадиган Британия кўмагини эълон қилиши кутилмоқда. Бу ҳақда “Reuters“ хабар берди.

Қайд этилишича, Бернэм Украинада “Иродалилар коалицияси” деб аталувчи, Украинани қўллаб-қувватлаётган давлатлар гуруҳи йиғилишига ҳамраислик қилади. Шунингдек, у Украина Президенти Владимир Зеленский билан учрашади.

Британия ҳукуматининг маълумотига кўра, Лондон Европанинг ракета ишлаб чиқарувчи компанияси MBDA’га Британияда ишлаб чиқарилган ва SCALP узоқ масофали қанотли ракетасида қўлланиладиган қисмларга оид махфий маълумотларни тақдим этишга рухсат беради.

Бу қарор Франция ва Украинага SCALP ракеталарини маҳаллий шароитда йиғиш линияларини ташкил этиш имконини беради. Мазкур ракета Британия ва Франция технологияларидан фойдаланади.

Британия Бош вазири Украина хавфсизлиги мамлакат хавфсизлиги билан чамбарчас боғлиқ эканини таъкидлаган.

“Украинанинг хавфсизлиги – бизнинг хавфсизлигимиз. Британия Украинани қанча вақт керак бўлса, шунча вақт қўллаб-қувватлайди”, деган Бернэм.

Буюк Британия 2022 йилда Россиянинг Украинага кенг кўламли босқини бошланганидан бери Киевнинг асосий ҳарбий ва сиёсий тарафдорларидан бири бўлиб келмоқда.

Лондон Украинага ҳарбий техника, иқтисодий ёрдам ва дипломатик кўмак кўрсатиб келмоқда. Мамлакат Россия босқинидан кейин Украинага Ғарбда ишлаб чиқарилган жанговар танклар ва узоқ масофали қанотли ракеталарни етказиб бериш режаларини биринчилардан бўлиб эълон қилган.

Британия ҳукумати Украинага ҳарбий ва фуқаролик ёрдами учун жами 25 миллиард фунт стерлингдан ортиқ маблағ ажратишни ваъда қилган. Энди Бернэмнинг Киевга ташрифи эса Британия янги ҳукумати даврида ҳам Украинани қўллаб-қувватлаш сиёсати давом этишидан далолат беради.

Бернэмнинг Украинага ташрифи Россия Британияни Киевга ҳарбий ёрдам кўрсатишда давом этаётгани сабабли “оқибатлар” билан огоҳлантирганидан бир ҳафта ўтиб амалга ошмоқда. Москва Лондонни урушдаги иштирокини чуқурлаштираётганликда айблаган. Бунга Британияда ишлаб чиқарилган дронлар илк бор Россия ҳудудига узоқ масофали зарбаларда қўлланилгани ҳақидаги хабарлар сабаб бўлган.

Шунга қарамай, Британия ҳукумати Украина хавфсизлигини мустаҳкамлаш бўйича саъй-ҳаракатларни давом эттиришини билдирган.

Эслатиб ўтамиз, Украина Президенти Владимир Зеленский июль ойи охирида Буюк Британияга ташриф буюрган эди.