“Барселона” жамоаси жаримага тортилди

Испаниянинг “Барселона” клуби “Атлетико Мадрид” ҳужумчиси Хулиан Альварес билан мадридликларни олдиндан хабардор қилмасдан музокара олиб боргани учун 602 евро миқдорида жаримага тортилди. Бу ҳақда “Mundo Deportivo” нашри хабар берди.

“Атлетико” Испания Қироллик футбол федерациясига (RFEF) шикоят билан мурожаат қилиб, каталонияликлар Альварес билан музокаралар бошлангани ҳақида клубни қоидаларда белгиланган тартибда ёзма равишда хабардор қилмаганини билдирган.

Қоидабузарлик енгил деб баҳоланган ва RFEF “Барселона”га 602 евро жарима белгилаган. Халқаро футбол федерацияси (FIFA) эса юрисдикцияси мавжуд эмаслиги сабабли ишни кўриб чиқмаган.

Маълумот учун, 26 ёшли Хулиан Альварес 2024 йилдан буён “Атлетико” шарафини ҳимоя қилиб келмоқда. У бунга қадар “Манчестер Сити” ва Аргентинанинг “Ривер Плейт” клубларида тўп сурган. Альварес “Манчестер Сити” сафида икки марта Англия чемпиони бўлган, шунингдек, Чемпионлар лигаси, клублар ўртасидаги жаҳон чемпионати ва бошқа халқаро совринларни қўлга киритган.