“Барселона” Алваресга муқобил вариант топди

Испаниянинг “Барселона” жамоаси аргентиналик ҳужумчи Хулиан Алваресни трансфер қилиш қийинлашаётгани сабабли Лаутаро Мартинесни унга муқобил вариант сифатида кўрмоқда. Бу ҳақда “beIN SPORTS” нашри хабар берди.

Манбага кўра, каталонияликлар “Интер” ҳужумчиси Лаутаро Мартинесни эҳтимолий “Б” режаси сифатида кўриб чиқмоқда. Агар яқин кунларда Алварес трансфери бўйича ижобий натижага эришилмаса, “Барселона” Лаутаро Мартинес вариантига жиддий эътибор қаратади.

Бироқ аргентиналик ҳужумчининг трансфери ҳам каталонияликлар учун осон бўлмайди. Мартинеснинг “Интер” билан шартномаси 2029 йил июнь ойига қадар амал қилади.

Ўтган йил май ойида футболчининг ўзи “Интер”дан кетиш нияти йўқлигини билдирган эди. Клуб президенти Жузеппе Маротта эса “Барселона” билан Мартинес трансфери бўйича музокаралар олиб борилганини қатъиян рад этган.

Маҳаллий ОАВларнинг хабарларига кўра, “Интер” Мартинесни тахминан 120 миллион евро эвазига қўйиб юборишга тайёр.