Бағдодда Қуръон ёқилишига қарши намойиш. Швеция элчихонасига бостириб кирилди

Бугун, 29 июнь куни бир гуруҳ ироқликлар мусулмонлар учун муқаддас китоб – Қуръоннинг ёқиб юборилишига қарши норозилик билдириб, Бағдоддаги Швеция элчихонасига бостириб кирди. Бу ҳақда “Shafaq News” портали хабар берди. 

Қайд этилишича, Швеция дипломатик миссияси биноси яқинида юздан ортиқ намойишчилар йиғилган. Бир мунча вақт олдин бир гуруҳ намойишчилар Бағдоднинг марказий қисмида жойлашган Швеция элчихонаси ҳудудига дарвозани бузиб киришга муваффақ бўлган. Дипломатик миссияга етказилиши мумкин бўлган зарар ҳақида маълумот йўқ.

“Al Sumria” телеканалига кўра, элчихона ҳудудига кирган шахслар аллақачон уни тарк этган. Намойиш пикетида қатнашган бошқа ироқликлар ҳам бинони тарк этмоқда. Қайд этилишича, йиғилиш иштирокчилари Исломнинг муқаддас китоби таҳқирланишига норозилик сифатида Швеция элчисини Ироқдан чиқариб юборишни талаб қилган.

Эслатиб ўтамиз, кеча, 28 июнь куни Швеция пойтахти Стокгольм марказидаги Медборъярплатсен майдонида яна муқадддас Қуръони карим таҳқирланди. Намойишда ироқлик 37 ёшли муҳожир Салван Момика муқаддас китобни ёқиб юборди. 

У араб тилида нутқ қилиб, мусулмонларнинг муқаддас китобидан варақларни йиртиб, ўт қўйди. Акция содир бўлган жойда Швеция ва халқаро ОАВ вакиллари, шунингдек, 200 га яқин томошабин бўлган. Полиция ташкилотчига тош отмоқчи бўлган эркакни қўлга олди. 

Намойишдан олдин Момика ТТ телеканалига берган интервьюсида таржимон ёрдамида “Қуръонни ёқиб юборамиз, Швецияни уйғот, деймиз. Бу демократия, бизга рухсат йўқ дейишса, бу хавфли”, деб бақирган.