“Азов” Россия қўшинларининг Донецкдаги ёнилғи таъминотини йўқ қилди

Украина Миллий гвардиясининг 1-корпуси – “Азов” бўлинмалари Донецк вилоятининг Россия томонидан босиб олинган ҳудудларида жойлашган бир қатор ёнилғи сақлаш ва таъминот объектларини йўқ қилганини маълум қилди. Бу ҳақда корпус ўзининг Facebook’даги саҳифасида ёзиб қолдирди.

Қайд этилишича, операция “Пекло-2” деб номланган бўлиб, бир ой давомида амалга оширилган. “Азов”га кўра, нишонга олинган объектлар Россия қўшинларини ёнилғи билан таъминлаш учун фойдаланилган.

“Бир ой аввал босқинчиларни огоҳлантирган эдик: “Азов” уларнинг ҳаракатларини кузатмоқда ва керакли вақтда зарба беради. Шунга қарамай, Россия Қуролли кучларининг айрим бўлинмалари босиб олинган Донецк ҳудудида ёнилғи сақлашда давом этди”, дейилади баёнотда.

Бўлинма томонидан эълон қилинган харитада Россия қўшинларининг ёнилғи сақлаш ва таъминот объектлари қизил нуқталар билан белгиланган. “Азов” ушбу объектларнинг бир ой ичида йўқ қилинганини таъкидлаган.

Шунингдек, корпус фуқаролик ёнилғи қуйиш шохобчалари ва тинч аҳоли нишонга олинмаётганини, зарбалар фақат Россия оккупацион кучларининг ҳарбий инфратузилмасига қаратилганини билдирган.

Эслатиб ўтамиз, аввалроқ Украина Россиянинг Самара вилоятидаги “Роскосмос”га қарашли “Прогресс” маркази, Саваслейка аэродроми ҳамда Усть-Лугадаги нефть объектига зарба берган эди.