Андижонда йигитни шахсий расмлари билан шантаж қилганлар ушланди (видео)

Андижонда шахсий фото ва видеоларни тарқатиб юбориш билан қўрқитиб, пул талаб қилган уч нафар шахс ушланди. Бу ҳақда Ички ишлар вазирлиги хабар берди.

Қайд этилишича, тезкор тадбир давомида компьютер ўйингоҳларидан бирида уч нафар шахс олдиндан тил бириктириб, 2008 йилда туғилган йигитдан пул ундиришни режалаштирган. Улар йигитнинг таниш қиз билан муносабатда эканини билиб, унинг мобил телефонини тортиб олган.

Шундан сўнг улар телефон хотирасидаги шахсий фото ва видеоларни ўз қурилмаларига кўчириб, ушбу материалларни интернет ва ижтимоий тармоқларда тарқатиш ҳамда йигитни яқинлари олдида шарманда қилиш билан таҳдид қилган. Бунинг эвазига эса 10 миллион сўм талаб қилишган.

Ҳуқуқни муҳофаза қилувчи органлар томонидан ўтказилган тезкор тадбир вақтида гумонланувчилар талаб қилинган пулни олаётган пайтда қўлга олинган.

Мазкур ҳолат юзасидан уларга нисбатан Жиноят кодексининг 165-моддаси (Товламачилик) иккинчи қисми “в” банди билан жиноят иши қўзғатилган. Ҳозирда тергов ҳаракатлари давом этмоқда.

Эслатиб ўтамиз, аввалроқ Фарғона вилоятида фуқарони калтаклаб, унинг шахсий ҳаётига оид тасвирларни тарқатиш билан қўрқитиб пул талаб қилган 5 нафар йигит қўлга олингани ҳақида хабар берилган эди.