Албания парламентида жанжал: депутатлар муштлашиб кетди (видео)

Тиранада давом этаётган талабалар намойишлари фонида Албания парламентида ҳукумат ва мухолифат депутатлари ўртасида тўқнашув юз берди. Бу ҳақда кеча, 23 октябрь куни “Euronews” хабар берди.

Қайд этилишича, низо парламент раҳбарияти мухолифатнинг пойтахтда ўнинчи кун давом этаётган талабалар акциялари бўйича мунозаралар ўтказиш талабини рад этганидан кейин бошланган. Мухолифатчи депутатлар полиция билан тўқнашувларда жабрланган талабаларнинг фотосуратларини кўтариб чиққан ва парламент трибунасини тўсиб қўйган. Шунга қарамай, депутатларнинг кўпчилиги қонун лойиҳалари бўйича овоз беришни давом эттирган. Бу вақтда парламент биноси олдида талабалар гуруҳлари йиғилган.

Тиранадаги намойишлар деярли икки ҳафтадан бери давом этмоқда. Намойишчилар акциялар чоғида кучишлатар тузилмалар ходимларига тош, мушак, “Молотов коктейли” (ёнувчи аралашмали шишалар) ва петардалар отиб, полиция билан тўқнашмоқда. Полиция дубинкалар, сув пуркагичлар ва кўздан ёш оқизувчи газни қўлламоқда.

Албания олий ўқув юртларининг мактаб ўқувчилари ва талабалари ўқиш тўловини камайтиришни, таълимга давлат инвестицияларини оширишни ва ушбу соҳадаги коррупцияга қарши чоралар кўришни талаб қилмоқда. Кейинчалик намойишларга Бош вазир Эди Раманинг истеъфосини талаб қилаётган кенгроқ ҳукуматга қарши ҳаракат иштирокчилари ҳам қўшилган.

Рама истеъфога чиқиш ниятида эмас ва намойишчиларнинг қонуний талабларидан атайлаб зўравонликни келтириб чиқараётган кучлар фойдаланмоқда деб ҳисоблайди.

Талабалар акциялари Адриатиканинг жанубий соҳилидаги ҳашаматли сайёҳлик мажмуасининг йирик лойиҳасига қарши чиққан “Фламинго” ҳаракатининг бир неча ойлик намойишларидан сўнг бошланган. Лойиҳа АҚШ Президенти Дональд Трампнинг куёви Жаред Кушнер томонидан асос солинган инвестиция компанияси билан боғлиқ.

Эслатиб ўтамиз, аввалроқ БМТ Бош котиби Антониу Гутерриш Европа ва бошқа минтақаларни қамраб олган норозилик намойишлари чоғида содир этилаётган зўравонлик ҳаракатларини қоралаган эди ва норозиликлар сабабини урушларнинг иқтисодий оқибатлари билан боғлаганди.