Альварес фаолиятини яна АПЛда давом эттириши мумкин

Аргентина терма жамоаси билан жаҳон чемпиони бўлган ҳужумчи Хулиан Альварес “Атлетико Мадрид”ни тарк этиб, фаолиятини “Арсенал”да давом эттириши мумкин. Бу ҳақда “TEAMtalk” хабар берди.

Манбага кўра, Лондон клуби Альваресга ўтган ёздан бери қизиқиш билдириб келмоқда. Аввалроқ, “Атлетико” ҳужумчини қўйиб юборишга тайёр бўлган, бироқ футболчининг ўзи “Барселона”га ўтишни истаган. Мадрид клуби эса тўғридан тўғри рақобатчиси билан трансфер бўйича музокара олиб боришдан бош тортган.

Айни пайтда Альвареснинг “Атлетико”даги узоқ муддатли истиқболидан қониқмаётгани ва “Арсенал” билан музокараларга очиқ экани айтилмоқда. Лондонликлар 26 ёшли ҳужумчини таркибга қўшиб олиш учун 100 миллион фунт стерлинг, яъни тахминан 118 миллион евро тўлашга тайёр.

Маълумот учун, Альварес жорий мавсумда Ла Лигада тўртта учрашувда майдонга тушган. Бироқ у ҳозиргача бирор марта асосий таркибда ўйинни бошламаган ва гол ура олмаган. Аргентиналик футболчининг “Атлетико” билан амалдаги шартномаси 2030 йилнинг ёзига қадар тузилган. “Transfermarkt” портали унинг трансфер қийматини 110 миллион евро деб баҳоламоқда.