Альварес “Атлетико” навбатдаги учрашувида ўйнамайди – Симеоне

“Атлетико Мадрид” бош мураббийи Диего Симеоне ҳужумчи Хулиан Альварес Ла Лиганинг “Севилья”га қарши ўйинида иштирок этмаслигини маълум қилди. Бу ҳақда мураббий ўйин олди матбуот анжуманида тўхталиб ўтди.

“Барча саволлар Хулиан ҳақида бўлишини тушунаман. Аммо ҳозир менинг бутун эътиборим “Севилья”га қарши ўйинга қаратилган. Шубҳасиз, Хулиан у ерда бўлмайди. Биз икки ўйинда ғалаба қозониб, ўзига ишончи юқори бўлган рақибга қарши майдонга чиқамиз”, дейди Симеоне.

Аргентиналик ҳужумчи кетма-кет учта машғулотни ўтказиб юборди. “Атлетико Мадрид” бош директори Мигель Марин бунинг сабаби футболчи ҳаётидаги “шахсий ва профессионал жиҳатдан жуда-жуда мураккаб вазият” билан боғлиқлигини айтган.

“Хулиан жуда жиддий вазиятга тушиб қолган. Чунки уни алдашга ва чалғитишга уринаётган одамлар бор. У ажойиб профессионал ва юқори савиядаги футболчи, аммо ҳозирда жуда қаттиқ чалкаш ҳолатда”, дейди Марин.

Альварес билан боғлиқ можаро жорий йилнинг май ойида “The New York Times” нашри “Барселона” футболчи билан шартнома имзолаш бўйича музокаралар олиб бораётгани ҳақида хабар берганидан кейин авж олди. Кейинчалик бу ҳаракат “Барселона” президенти Жоан Лапорта томонидан ҳам тасдиқланган.

Нашр маълумотига кўра, Каталония клуби футболчи учун 100 миллион евроли расмий таклиф тайёрлаётган эди. Шундан сўнг “Атлетико Мадрид” “Барселона”нинг аргентиналик ҳужумчини ўз сафига жалб қилишга уринишлари юзасидан Испания Қироллик футбол федерациясига (RFEF) шикоят қилди.

Натижада RFEF “Барселона”га қарши интизомий иш қўзғатди. Каталония клуби “Атлетико” билан 2030 йилгача шартномаси амал қиладиган Альварес билан рухсатсиз алоқа қилганликда айбланди.

Жорий йилнинг июнь ойида “Атлетико Мадрид” Альваресни “Реал”га 150 миллион еврога сотишдан бош тортгани ҳақида хабарлар тарқалган эди.