Альварес “Атлетико”да бошқа ўйнамоқчи эмас – ОАВ

“Атлетико Мадрид” ҳужумчиси Хулиан Альварес қатъий қарорга келиб, “Барселона”га ўтишни режалаштирмоқда. Бу ҳақда “Mundo Deportivo” нашри хабар берди.

Манбага кўра, аргентиналик футболчи шахсан Мадрид клуби бош мураббийи Диего Симеоне билан учрашиб, ундан трансферни амалга оширишга ёрдам беришни сўрашни режалаштирган. Бироқ Альварес мураббийи билан суҳбатлаша олмаган. Симеоне икки кунлик таътилдан фойдаланиб, Ибице оролига йўл олган. Ҳужумчи таътилда бўлган “Атлетико” бош директори билан ҳам учраша олмаган. Манбага кўра, бу ҳолат футболчининг жаҳлини чиқарган.

Альварес машғулот майдонида клуб вакилларига энди майдонга туша олмаслигини маълум қилган. Аргентиналик футболчи Симеоне қайтганидан сўнг унга ўз қарорини шахсан билдирмоқчи.

Эслатиб ўтамиз, аввалроқ агар “Барселона” Альварес трансферини ижобий якунлай олмаса, аргентиналик бошқа бир ҳужумчи Лаутаро Мартинес вариантини кўриб чиқиши ҳақида хабар берилганди.