АҚШда икки вертолёт тўқнашиб, уч киши ҳалок бўлди

АҚШнинг Орегон штатида икки вертолёт ҳавода тўқнашиб кетиши оқибатида 3 киши ҳалок бўлди. Ҳодиса кеча, 29 октябрь куни Макминвилл муниципал аэропорти яқинида содир бўлган. Бу ҳақда BBC хабар берди.

Маълум қилинишича, Robinson R22 ва Airbus русумли вертолётлар тўқнашганидан сўнг автомобиль йўли яқинидаги далага қулаб тушган.

Ҳалок бўлганлар орасида Техас штатидан бўлган 22 ёшли учувчи-инструктор Мэдди Аасбо ва унинг Буюк Британиядан келган шогирди бор. Иккинчи вертолётда бўлган 38 ёшли Орегон штатининг Ньюберг шаҳри фуқароси Тайлер Делэйн Стурдевант ҳам ҳалок бўлган. Британлик шогирднинг шахси ҳозирча ошкор этилмаган.

Вертолётлардан бири Макминвилл муниципал аэропортида жойлашган “Jerry Trimble Helicopters” учувчиларни тайёрлаш мактабига тегишли бўлган. Компания ҳодиса юзасидан тергов олиб бораётган мутасаддилар билан ҳамкорлик қилаётганини билдирган.

Ҳозирча тўқнашув сабаблари маълум қилинмаган. АҚШ Федерал авиация бошқармаси ва Миллий транспорт хавфсизлиги кенгаши ҳодиса юзасидан тергов олиб бормоқда.

Эслатиб ўтамиз, аввалроқ бортида беш киши бўлган тиббий авиация хизмати вертолёти АҚШда сувга қулаган эди. Оқибатда икки киши ҳалок бўлиб, яна бир киши бедарак йўқолган.