АҚШ ва Эрон ўзаро энг йирик денгиз зарбаларини амалга оширди

Кеча, 9 сентябрь куни Эрон ва АҚШ ўртасидаги олти ойлик уруш бошланганидан буён денгиздаги кемаларга қарши энг йирик ҳужумлар тўлқини қайд этилди. Эрон 10 та кемани нишонга олганини билдирган бўлса, АҚШ ҳарбийлари 5 та Эрон нефть танкерини йўқ қилганини маълум қилди. Бу ҳақда “Reuters” хабар берди.

Маълум қилинишича, кемаларга қилинган ҳужумлар оқибатида камида бир денгизчи ҳалок бўлган, яна бир киши бедарак йўқолган. Ҳодисалар томонлар ўртасида бир ой давом этган нисбий сокинликдан кейин содир бўлди. Бу даврда АҚШ Эронга асосан иқтисодий босим ўтказишга уринган.

Эрон Исроил томонидан эмас, балки Иордания ҳудудидаги АҚШ ҳарбий базасига баллистик ракеталар билан зарба берганини маълум қилган. Иордания 18 та ракетани ушлаб қолганини, яна иккитаси аҳоли яшамайдиган ҳудудларга зарар етказмасдан тушганини билдирган. АҚШ расмийси эса барча америкалик ҳарбийлар соғ-саломат эканини айтган.

Эрон Ислом инқилоби қўриқчилари корпуси кейинги ҳужумларга жавоб янада кескин бўлишини билдирган. Қўриқчилар, шунингдек, денгиздаги тақиқланган янги ҳудуд харитаси яқин орада эълон қилинишини, мазкур зона Покистон чегараси яқинидаги Чобаҳоргача чўзилишини маълум қилган.

АҚШ Президенти Дональд Трамп эса Теҳронни ноябрь ойидаги АҚШ Конгресси сайловларига таъсир ўтказишга уринишда айблаган.

“Менимча, уруш сайловдан кейин дарҳол тугайди, чунки улар бундан ортиқ чидай олмайди. Улар сайловга таъсир ўтказишга умидсизларча уринмоқда”, деган Трамп журналистларга.

Шу билан бирга, “The Wall Street Journal” АҚШ Президентининг юқори мартабали маслаҳатчилари, жумладан вице-президент Жей Ди Вэнс ва давлат котиби Марко Рубио Трампни уруш унинг президентлик муддати 2029 йил январда тугагунига қадар давом этиши мумкинлигидан огоҳлантиргани ҳақида хабар берган. “Reuters” ушбу маълумотни мустақил равишда тасдиқлай олмаган.

АҚШ 5 та Эрон танкерини йўқ қилган

АҚШ ҳарбийлари бир кечада Эронга тегишли 5 та нефть танкерини йўқ қилганини маълум қилган ва кемалар ёнғин ичида қолгани акс этган видеоларни эълон қилган.

АҚШ Марказий қўмондонлиги бу ҳужумларни Эрон Ислом инқилоби қўриқчилари корпуси АҚШ ҳарбий кемасига икки марта баллистик ракета билан зарба беришга уринганига жавоб сифатида амалга оширилганини билдирган. АҚШ маълумотларига кўра, ҳодисаларда америкаликлар жабрланмаган.

Вашингтон ҳарбий кемаларига таҳдид солувчи ҳужумларга жавобан Эрон танкерларини нишонга олиш сиёсатини эълон қилган. АҚШ бир ҳафта давомида жами 10 та танкерга зарба берилганини билдирган.

Давлат котиби Марко Рубио Эрон АҚШ ҳарбий кемаларига ҳужум қилишда давом этса, ҳар бир бундай ҳаракат учун танкерлардан айрилишини айтган. Эрон эса жавобан 2 АҚШ кемаси ва 8 та танкерга ҳужум қилинганини маълум қилган.

Қайд этилишича, Дубай яқинида турган Hercules Star нефть маҳсулотлари ташувчи танкердаги ҳодиса оқибатида бир денгизчи ҳалок бўлган, яна бир экипаж аъзоси бедарак йўқолган. Бу ҳақда кема чартерчиси Peninsula маълум қилган.

Британиянинг денгиз хавфсизлиги агентлиги UKMTO эса ҳудуддаги 1 кема снаряд зарбасидан кейин ёнбошлаб қолгани ҳақида маълумот олганини билдирган. Ироқ порт расмийларининг айтишича, 2 миллион баррел мазут ташиётган New Andros танкери Ироқ ҳудудида дрон зарбасидан кейин ёнғин билан қопланган. Кема бортидаги 22 нафар экипаж аъзосидан ҳеч бири жабрланмаган.

UKMTO, шунингдек, Форс кўрфази ва Уммон кўрфазининг Ҳормуз бўғозига яқин қисмида бир нечта савдо кемасига зарар етказувчи ўт очилгани ҳақида хабарлар келиб тушганини билдирган.

Манбага кўра, ҳужумлар оқибатида нефть нархи кескин ошган. Brent маркали нефть нархи 9 сентябрь куни баррели учун 100 доллардан ошиб, июль ойидан буён биринчи марта ушбу кўрсаткичга етган.

Эслатиб ўтамиз, аввалроқ Саудия Арабистонига Ямандаги Эрон қўллаб-қувватлаётган ҳусийлар томонидан уюштирилган ҳужумлар оқибатида камида 73 киши жароҳатланганди.