АҚШ Patriot захирасининг 5 фоизи Украинанинг қишдан чиқишига етади – Зеленский (видео)

Украина Президенти Владимир Зеленский мамлакат қишни ўтказиши учун АҚШ Patriot ракеталари захирасининг 5 фоизи, Россиянинг барча баллистик ҳужумларини қайтариш учун эса ушбу захиранинг 10 фоизига муҳтожлигини маълум қилди. Бу ҳақда у CNN телеканалига берган интервьюсида айтиб ўтди.

“Агар АҚШ бизга Patriot ракеталари захирасининг 5 фоизини сотса, биз қишдан ўтиб, одамларнинг ҳаётини сақлаб қоламиз. Агар улар бизга 10 фоизини сота олсалар, биз русларнинг барча баллистик ракеталарини йўқ қиламиз. Менда эса 1 фоиз бор”, деган Украина раҳбари.

Зеленскийнинг айтишича, у ҳар куни иттифоқчилар билан қўшимча тутиб қолувчи ракеталар ажратилиши бўйича музокаралар олиб боради ва сон-саноқсиз телефон қўнғироқларини амалга оширади.

“Бу йил бизда 2025 йилга нисбатан икки ярим баробар камроқ тутқич ракеталар бор. Россияда эса ойига аввалгидан икки баробар кўп баллистик ракеталар мавжуд. Ҳар кеча ҳужумлар бўлади, ойига тўрт-беш марта эса кенг кўламли ҳужумларга дуч келамиз. Одамларимиз жуда қаҳрамон ва матонатли, аммо улар чарчаган”, деган у.

Зеленскийнинг айтишича, у ҳар куни қўшимча тутиб қолувчи ракеталарни олиш масаласи билан шахсан шуғулланади. Бунинг учун эса айрим тафсилотларини ошкор қила олмайдиган келишувлар устида ишлашига тўғри келмоқда.

“Мен ҳар куни шундай яшайман: 1 фоиздан 5 фоизгача. Мен бирор нарсани ракеталарга алмаштиришга ҳаракат қиламан. Мен ҳатто баҳам кўролмайдиган баъзи ишларни қиламан. Бу қонундан ташқари дегани эмас. Лекин мен бу ҳақда гапира олмайман”, деган Украина раҳбари.

Зеленскийнинг сўзларига кўра, Президент Дональд Трампнинг Украинага ўзининг Patriot ракеталарини қуришга рухсат бериш ҳақидаги аниқ ваъдаси қандай амалга ошишига ҳали ҳам шубҳа бор.

Трамп НАТОнинг Анқара саммити доирасида Украинага мураккаб тутқичларни ўзлари ишлаб чиқариш учун лицензия олишга рухсат беришини айтган эди. Бироқ Трамп бир неча кундан кейин бу ғояга ишончи комил эмаслигини билдирган.

Зеленский айрим Ғарб экспертларининг Путиннинг НАТОга қарши ҳаракатларини кучайтириб, ҳатто Болтиқбўйи давлатларидан бирига ҳужум қилиши мумкинлиги ҳақидаги фикрига қўшилишини айтган.

“Путин бу урушни йирик ғалабасиз қандай якунлашни билмайди. Шу сабабли у кичикроқ давлатни нишонга олиши мумкин. У учун бу мамлакат НАТО аъзоси эканлиги муҳим эмас. Асосийси, тез ғалабага эришиш ва ҳудудни эгаллаш ёки назорат қилишдир”, деган Зеленский.

Эслатиб ўтамиз, аввалроқ Украина Президенти Владимир Зеленский Россия билан тинчлик битимини АҚШ Президенти Дональд Трамп истаган жойда, жумладан, Оқ уй ёки Флоридадаги Мар-а-Лаго қароргоҳида имзолашга тайёрлигини маълум қилган эди.