АҚШ Мадуро ушланаётганда сунъий йўлдош сигналларини ўчириб қўйган – ОАВ

АҚШ Космик кучларининг радиоэлектрон кураш мажмуалари америкалик ҳарбийларни ҳимоя қилишда ва дунёнинг турли нуқталарида “душман” сунъий йўлдошлари сигналларини бостиришда муҳим роль ўйнамоқда. Бу ҳақда “The Wall Street Journal” хабар берди.

Нашр журналистларига Колорадодаги Космик кучлар базасига ташриф буюриш ва ушбу тизимлар қандай ишлашини билиш учун камдан-кам бериладиган имконият тақдим этилган.

WSJ мухбирлари, шунингдек, АҚШнинг Венесуэла ва Эрондаги операциялари пайтида хорижда ушбу мажмуаларни қўллаган “посбонлар” (Космик кучлар ҳарбий хизматчилари шундай аталади) билан эксклюзив суҳбат ўтказган. Нашр идоранинг ердаги қуроллари ҳақида видеорепортаж эълон қилган.

Жумладан, техник сержант Жошуа Ломакс Венесуэла етакчиси Николас Мадурони қўлга олаётган америкалик ҳарбийлар атрофида ҳимоя майдонини яратиш орқали сунъий йўлдошлар сигналини тўсиб қўйганини айтиб берган. Орадан бир неча соат ўтгач, унга ускуналарни йиғиш ва Яқин Шарққа учиб кетиш учун 72 соат вақт берилган. Кўп ўтмай, у ерда АҚШ Эронга қарши уруш бошлаган.

“Сиқилиш ва таранглик жуда юқори эди. Ҳамма огоҳ ҳолатда эди ва доимо атрофга аланглаб қарарди”, дейди Ломакс.

Эслатиб ўтамиз, Мадурони қўлга олиш бўйича “Мутлақ қатьият” номини олган операция жорий йил 3 январга ўтар кечаси бўлиб ўтганди. “The New York Times”нинг ёзишича, у Каракаснинг катта қисмини электр энергиясидан маҳрум қилган кенг кўламли киберҳужум билан бошланган ва унда 150 дан ортиқ учиш аппарати, жумладан, радиоэлектрон кураш самолётлари иштирок этган. Мадуро ва унинг рафиқаси АҚШга олиб кетилган ва у ерда унга наркотрафик билан боғлиқ айбловлар қўйилган.