АҚШ хорижлик талабалардан 100 минг доллардан ундирмоқчи

АҚШ Миллий хавфсизлик вазирлиги агар хорижий талабалар мамлакатда ишлашни хоҳласа, уларни таълим учун камида 100 минг доллар тўлашга мажбур қилишни таклиф этди. Бу ҳақда “Reuters” хабар берди.

Таклиф этилган режага кўра, F-1 визасига эга ноиммигрант талабалар қўшимча амалий тайёргарлик (OPT) учун сертификатланган ўқув муассасасига 70 минг доллар ва иш жойидаги ҳар қандай қўшимча таълим учун 30 минг доллар тўлашлари керак бўлади. OPT тизими доирасида хорижий талабалар ўқув семестри давомида ҳафтасига 20 соатгача, шунингдек, ўқишни битиргандан сўнг чекланган вақт давомида ишлаб чиқариш амалиётини ўташи мумкин. Фан, техника, инженерия ва математика (STEM) соҳасида дипломга эга бўлганлар учун қўшимча муддат кўзда тутилган. Ҳозирги вақтда бунинг учун тўлов тахминан 500 долларни ташкил этади.

Миллий хавфсизлик вазирлиги янги қоидалар “фирибгарликка қарши курашиш, иммиграция тизимининг мустаҳкамлигини мустаҳкамлаш ва америкалик ходимларни ҳимоя қилиш”га қаратилганини маълум қилди.

“Миллий хавфсизлик вазирлиги иш берувчилар, талабалар ва ўқув муассасалари F-1 визаси бўйича ноиммигрант сифатида мамлакатга кириш шартларига мос келувчи тегишли фаолият билан шуғулланишини таъминлаш учун тўлов жорий этмоқда”, дейилади идора хабарида.

Қайд этиш жоиз, бу каби ўқитиш дастурлари кўпинча H-1B визалари бўйича ишлашни хоҳловчи талабалар учун ўтиш босқичи бўлиб хизмат қилади. Трамп маъмурияти йиғимларни ошириш орқали ушбу визаларни ҳам нишонга олган. Ўн йиллар давомида H-1B дастури бутун дунё бўйлаб ёш инженер ва олимларга АҚШ университетларидаги кўп йиллик ўқишни юқори ҳақ тўланадиган ишга ва АҚШда доимий яшаш жойига эришиш йўлига айлантириш имконини бериб келган. АҚШнинг етакчи технология компаниялари вакансияларни тўлдиришда кўп жиҳатдан ушбу мутахассисларга таяниб қолган.

Вазирлик таклифи 30 кун давомида жамоатчилик томонидан кўриб чиқилиши керак. Шундан сўнг, у тасдиқланади. Бироқ идора коллежлар, ўқувчилар ва иш берувчиларга тайёргарлик кўриш учун вақт бериш мақсадида қоида якуний тасдиқланганидан кейин уни амалга киритишдан олдин 60 кун кутишини маълум қилган.